Branch Letter

Eka Vahuweleri Lava Rhandzekaka:

Eku sunguleni ka lembe leri ra ntirho, ku vumbiwe xifundzha lexintshwa eka nsimu leyi welaka erhavini ra Afrika Dzonga, leswi vulaka leswaku ku vumbiwe swifundzha leswintshwa swa 14 eka malembe ya tsevu lama hundzeke. Sweswi nsimu ya rhavi ra Afrika Dzonga yi ni swifundzha swa 84 ni miganga ya tsevu.

Ku karhi ku endliwa ntirho lowukulu wo chumayela mahungu lamanene eka lava feke tindleve. Ku vumbiwe mavandlha man’wana mambirhi ya lava vulavulaka hi mavoko, rin’we ePitori ni rin’wana eCape Town. Ku engetela eka mavandlha manharhu lama nga kona ya ririmi ra mavoko, ku ni mintlawa leyi tlulaka 30 ya lava vulavulaka hi mavoko, leyi hlanganyelaka ni mavandlha yo hambana-hambana laha Afrika Dzonga ni le ka matiko lama akelaneke na hina, lama welaka erhavini ra hina. Xana u nga dyondza ririmi ra mavoko leswaku u ta pfuna ensin’wini leyi yi nga ni ntlhontlho?

Vavalangi va karhi va ta hi vunyingi leswaku va ta vona muako lowuntshwa wa vugandliselo. Ku sukela loko muchini lowuntshwa wo gandlisa wa MAN wu sungule ku tirha hi June 2004 ni wo hlanganisa swiyenge swa tibuku wu sungule ku tirha hi September 2004, ku te vanhu vo tlula khume ra magidi va ta valanga erhavini. Eka yin’wana ya tiholideyi hi tsake ngopfu ku va ni vaendzi va 2 519. Loko se ku ri masikunyana u nga si endzela eBethele, ha ku rhamba leswaku u endla tano. Kambe tsundzuka leswaku a ku valangiwi hi Mugqivela. Leswi swi vangiwa hi leswi michini yo kandziyisa, yo hlanganisa swiyenge swa tibuku ni tindzawulo tin’wana swi nga tirhiki hi Mugqivela.

Hi August 2005 ku sungule ntirho wo aka muako lowuntshwa wo tshama eka wona ni ku engetela ndhawu yo dyela eka yona. Miako leyi yi ta akiwa hi tikontraka leti hirhiweke. Vamakwerhu lava nga ni ntokoto va ta langutela ntirho lowu ku tiyiseka leswaku i wa xiyimo lexi amukelekaka. Ku ringanyetiwa leswaku ntirho lowu wu ta hela endzhaku ka tin’hweti ta kwalomu ka 15.

Hi June 4, 2005, a ku ri siku ro gimeta ntlawa wa vumune lowu a wu ri wo hetelela wa xikolo xa valanguteri va swifundzha. Leswi swi vula leswaku 91 wa valanguteri va swifundzha ni va miganga lava nga le hansi ka rhavi ra Afrika Dzonga va kume dyondzo leyi yo hlawuleka ya tin’hweti timbirhi naswona va lunghekele ku ya va mpfuno ensin’wini.

Hinkwayo migingiriko leyi yo yisa timhaka ta Mfumo emahlweni ya bumabumeriwa! Nakambe yi tlangeriwa ngopfu minyikelo ya n’wina yo seketela ntirho. (Swiv. 3:9, 10) Onge Yehovha a nga hambeta a katekisa matshalatshala ya hina yo “tirhela ku dzunisa ku vangama ka yena.”—Efe. 1:12.

Vamakwenu,

Rhavi Ra Afrika Dzonga