Branch Letter
Eka Vahuweleri Va Mfumo Lava Rhandzekaka:
Ha tsaka ku vona nhluvuko lowu endliweke entirhweni wa lembe ra ntirho ra 2007 emasin’wini lama languteriwaka hi rhavi ra Afrika Dzonga. Hi April hi fikelele nhlohlorhi leyintshwa ya vahuweleri va 79 266 laha Afrika Dzonga. Hi January tiko ra Lesotho ri vike nhlohlorhi leyintshwa ya vahuweleri va 3 376 naswona tiko ra Botswana ri vike nhlohlorhi leyintshwa ya vahuweleri va 1 681. Hi March tiko ra Namibia ri vike nhlohlorhi leyintshwa ya vahuweleri va 1 499 naswona hi April tiko ra Swaziland ri vike nhlohlorhi leyintshwa ya vahuweleri va 2 529. Mi tirhile vamakwerhu! Hi April a hi yi fikelelanga pakani ya hina ya maphayona ya nkarhinyana ya 14 000, hilaha a swi ringanyetiwe hakona eka xiengetelo xa Vutirheli Bya Hina Bya Mfumo bya February. Hambiswiritano, ku ve ni ntsengo wa vamakwerhu va 9 036 lava veke maphayona ya nkarhinyana ematikweni hinkwawo lama languteriwaka hi rhavi ra hina.
Hi September 2006 vo tala va tiphinile hi ku fambisa Xalamuka! yo hlawuleka. Endzhaku ka sweswo hi ve ni tsima ro fambisa Kingdom News No. 37, leyi nge “Vukhongeri Bya Mavunwa Byi Ta Lovisiwa Ku Nga Ri Khale!” Makwerhu un’wana wa xisati la holeke emoyeni, endzhaku ko kuma kopi leyi ni ku yi hlaya, swi n’wi tsone vurhongo. Hi Sonto leyi landzelaka u ye eminhlanganweni kutani a kombela ku fambiseriwa dyondzo ya Bibele. Xirhambo xo hlawuleka xa mintsombano ya muganga na xona xi endle leswaku vanhu vo tala va va kona emintsombanweni. Jaha rin’wana le KwaZulu-Natal ri amukele xirhambo lexi kutani ri ya entsombanweni. Ku sukela siku rero a ri si tshama ri xwa eminhlanganweni naswona sweswi i muhuweleri la nga khuvuriwangiki. Van’wana emugangeni lowu jaha leri ri tshamaka eka wona va vone ku cinca loku ri ku endleke emahanyelweni ya rona kutani va kombela ku fambiseriwa dyondzo ya Bibele naswona va va kona eminhlanganweni. Lembe leri hi ta tlhela hi va ni lunghelo ro rhambela vanhu eka Ntsombano wa Muganga lowu nge “Landzela Kreste!”
Xikongomelo xa matsima wolawo i ku pfuna lava timbilu letinene leswaku va dyondza leswi Bibele yi swi dyondzisaka hakunene. (Mat. 28:19, 20) Loko u ri karhi u chumayela, tsundzuka ku xiya lava tsakelaka kutani u tlhelela eka vona hi xikongomelo xo sungula dyondzo ya Bibele. Ha tsaka ku va hi tirhisana na n’wina eka ntirho lowu wa nkoka naswona hi mi rungula hi rirhandzu ra hina ra Vukreste.
Vamakwenu,
Rhavi Ra Afrika Dzonga