Pfuna Van’wana Leswaku Va ‘Yingisa Ku Suka eMbilwini’

1. I yini leswi Yehovha a swi languteleke eka vagandzeri va yena?

¹ Ku yingisa i swa nkoka leswaku hi ta kota ku gandzela Yehovha hi ndlela leyi amukelekaka eka yena. (Det. 12:28; 1 Pet. 1:14-16) Ku nga ri khale Xikwembu xi ta avanyisa “lava va nga xi tiviki . . . ni lava va nga ma yingisiki mahungu lamanene.” (2 Tes. 1:8) Xana hi nga va pfuna njhani van’wana leswaku va swi ‘yingisa ku suka embilwini’ leswi Rito ra Xikwembu ri swi dyondzisaka?—Rhom. 6:17.

2. Ha yini swi ri swa nkoka ku pfuna van’wana leswaku va va ni ripfumelo leri tiyeke?

² Hi Ku Va Pfuna Leswaku Va Aka Ripfumelo Ni Rirhandzu: EMatsalweni ku yingisa ku fambisana swinene ni ripfumelo. Muapostola Pawulo u vulavule hi “xileriso xa Xikwembu lexi nga riki na makumu leswaku ku kondleteriwa ku yingisa hi ripfumelo.” (Rhom. 16:26) Vaheveru ndzima 11, yi ni swikombiso swo hlayanyana swa vanhu lava a va ri ni ripfumelo, lava a va hanya hi ku landza ku rhandza ka Yehovha. (Hev. 11:7, 8, 17) Hi hala tlhelo, ku nga yingisi swi fambisana ni ku pfumala ripfumelo. (Yoh. 3:36; Hev. 3:18, 19) Hi fanele hi hlakulela ku va ni vutshila byo dyondzisa Rito ra Xikwembu leswaku hi ta kota ku pfuna van’wana va va ni ripfumelo leri nga ta va endla leswaku va yingisa.—2 Tim. 2:15; Yak. 2:14, 17.

3. (a) Xana ku yingisa ku fambisana njhani ni rirhandzu? (b) Hi nga swi pfuna njhani swichudeni swa Bibele leswaku swi rhandza Yehovha?

³ Ku yingisa ku tlhela ku fambisana ni ku rhandza Xikwembu. (Det. 5:10; 11:1, 22; 30:16) Yohane wo Sungula 5:3 yi ri: “Ku rhandza Xikwembu, hi kona ku hlayisa swileriso swa xona; kasi loko swi ri swileriso swa xona a swi tiki.” Xana hi nga swi pfuna njhani swichudeni swa Bibele leswaku swi rhandza Yehovha? Loko mi ri karhi mi dyondza lava tindlela leti u nga xi pfunaka ha tona leswaku xi tlangela timfanelo ta Yehovha. Phofula ndlela leyi u titwaka ha yona hi Xikwembu. Pfuna xichudeni leswaku xi hlakulela vuxaka lebyikulu na Yehovha. Ku tlula hinkwaswo ku rhandza Yehovha swi ta hi khutaza—swi tlhela swi khutaza ni van’wana—leswaku hi n’wi yingisa swi huma embilwini.—Mat. 22:37.

4. (a) Ha yini xikombiso xa hina xi ri xa nkoka? (b) Xana hi fanele ku endla yini leswaku hi va ni “mbilu leyi yingisaka”?

⁴ Hi Ku Va Xikombiso Lexinene: Ndlela leyinene leyi hi nga khutazaka van’wana ha yona leswaku va yingisa mahungu lamanene i ku va xikombiso lexinene. Hambiswiritano ku laveka leswaku hi hambeta hi hlakulela “mbilu leyi yingisaka.” (1 Tih. 3:9; Swiv. 4:23) Xana leswi swi katsa yini? Wundla mbilu ya wena hi ku dyondza Bibele hi masiku ni ku ya eminhlanganweni nkarhi hinkwawo. (Ps. 1:1, 2; Hev. 10:24, 25) Tolovelana ni lava tiyimiseleke ku va evugandzerini bya ntiyiso. (Swiv. 13:20) Hlanganyela hi masiku entirhweni wa nsimu, u ri ni moya wo pfuna vanhu va le nsin’wini ya ka n’wina. Khongela Yehovha leswaku a ku pfuna u va ni mbilu leyinene. (Ps. 86:11) Papalata swilo leswi nga onhaka mbilu ya wena, swo fana ni vuhungasi lebyi thyakeke kumbe lebyi nga ni madzolonga. Hanya hi ndlela leyi ku tshinetaka eka Xikwembu naswona u tiyisa vuxaka bya wena na xona.—Yak. 4:7, 8.

5. Xana lava va yingisaka va katekisiwa njhani?

⁵ Yehovha u tshembise vanhu va yena enkarhini lowu hundzeke leswaku u ta tshama a ri karhi a va katekisa loko va yingisa rito ra yena. (Det. 28:1, 2) Ninamuntlha, Yehovha wa va katekisa la va n’wi “yingisaka tanihi mufumi.” (Mint. 5:32) Hikwalaho, onge hi nga pfuna van’wana leswaku va yingisa swi suka embilwini hi madyondziselo ya hina ni hi ku va xikombiso lexinene.