Twarisa Ku Vangama Ka Yehovha
1 Mupisalema u te: “Yimbelelelani Yehovha, n’wina hinkwenu vanhu va misava. . . . Vulani ku vangama ka yena exikarhi ka matiko, mintirho yakwe yo hlamarisa exikarhi ka vanhu hinkwavo.” Loko hi ri karhi hi ehleketisisa hi leswi Yehovha a swi endleke, leswi a swi endlaka ni leswi a nga ta swi endla enkarhini lowu taka, timbilu ta hina ti susumeteleka ku twarisa ku vangama kakwe.—Ps. 96:1, 3.
2 Ensin’wini: Timbhoni ta Yehovha ti ni nkateko wo byarha vito ra Xikwembu ni ku ri twarisa emisaveni hinkwayo. (Mal. 1:11) Kambe vafundhisi va Vujagana a va endli tano, va suse vito ra Xikwembu hi ku tikukumuxa eka vuhundzuluxeri bya Tibibele ta vona! Ntirho wo twarisa vito ra Xikwembu i wa xihatla, hikuva vanhu va fanele ku vitana vito rero hi ripfumelo leswaku va ta kutsuriwa eka nhlomulo lowukulu lowu taka. (Rhom. 10:13-15) Ku engetela kwalaho, ku rhula ka vanhu emisaveni hinkwayo ku titshege hi ku kwetsimisiwa ka vito ra Xikwembu. Hakunene mintirho hinkwayo ya Xikwembu yi fambisana ni vito ra xona.
3 “Yehovha i lonkulu naswona u fanele a dzunisiwa swinene.” Kambe leswaku vanhu va kota ku ‘nyika Yehovha ku vangama loku nga ka vito rakwe’ va fanele va n’wi tiva kahle. (Ps. 96:4, 8) Hambiswiritano, van’wana va kaneta leswaku Xikwembu xi kona. (Ps. 14:1) Van’wana va xi tekela ehansi va vula leswaku a xi na matimba kumbe va vula leswaku a xi na mhaka ni maxangu ya vanhu. Loko hi ri karhi hi pfuna lava nga ni timbilu letinene leswaku va kuma vutivi lebyi kongomeke hi Muvumbi wa hina, swikongomelo swakwe ni vumunhu bya yena lebyi rhandzekaka, hi vangamisa Yehovha.
4 Hi Mahanyelo Ya Hina: Ku hanya hi ku landza milawu yo lulama ya Yehovha swi tisa ku dzuneka eka yena. Vanhu va ma xiya mahanyelo ya hina lamanene. (1 Pet. 2:12) Hi xikombiso, ku basa ni ku languteka ka hina swi endla leswaku vanhu va vulavula kahle hi hina, leswi swi hi nyika nkarhi wo byela van’wana leswaku swa vuyerisa ku hanya hi misinya ya milawu leyi kumekaka eRitweni ra Xikwembu. (1 Tim. 2:9, 10) Ha tsaka hakunene loko van’wana va ‘vona mintirho ya hina leyinene kutani va vangamisa Tata wa hina la nge matilweni’!—Mat. 5:16.
5 Siku ni siku a hi dzuniseni Xikwembu xa hina lexi tlakukeke hi leswi hi swi vulaka ni hi swiendlo swa hina, hi ndlela yoleyo hi angula xirhambo lexi tsakisaka lexi nge: “Yimbelelelani Yehovha, dzunisani vito rakwe. Siku ni siku vulani mahungu lamanene ya ku ponisiwa ha yena.”—Ps. 96:2.