Dyondzo Leyi Nyikaka Vutomi
1 Swa tsakisa ku vona vanhu va tsaka loko va ri karhi va twisisa ntiyiso wa Rito ra Xikwembu! Hakunene swa tsakisa ku bula ni van’wana hi vutivi bya Xikwembu ni swikongomelo swa xona. Dyondzo yoleyo yi pfuna vanhu leswaku va kuma vutomi lebyi nga heriki.—Yoh. 17:3.
2 Lexi Endlaka Yi Va Leyi Tlakukeke: Namuntlha dyondzo yi kumeka hi tindlela to hambana-hambana naswona ku hlamuseriwa mhaka yin’wana ni yin’wana leyi nga kona. (Ekl. 12:12) Kambe dyondzo yoleyo a hi nchumu loko yi pimanisiwa ni “swilo leswikulu ngopfu swa Xikwembu.” (Mint. 2:11) Xana dyondzo ya misava yi swi kotile ku tshineta vanhu eka Muvumbi ni ku va pfuna leswaku va tiva swikongomelo swa yena? Xana yi swi kotile ku va pfuna va twisisa leswaku ku endleka yini hi hina loko hi fa nileswaku ha yini hi hlaseriwa hi maxangu yo tala swonghasi? Xana yi swi kotile ku endla leswaku va va ni ntshembo? Xana yi swi kotile ku antswisa vutomi bya ndyangu? Nikatsongo! Kutani a ku na dyondzo yin’wana leyi nga hi pfunaka hi swiphiqo leswi hi karhataka ngopfu evuton’wini loko ku nga ri dyondzo ya Xikwembu.
3 Dyondzo ya Xikwembu yi tamele nchumu wo karhi lowu misava ya namuntlha yi nga riki na wona—ku nga ku pfuna vanhu leswaku va va ni mahanyelo lamanene. Rito ra Xikwembu ri kota ku susa xihlawuhlawu ni vutiko etimbilwini ta lava va ri amukelaka va tlhela va hanya ha rona. (Hev. 4:12) Ri susumete vanhu leswaku va tshika muxaka wun’wana ni wun’wana wa tihanyi kutani va ‘ambala vumunhu lebyintshwa.’ (Kol. 3:9-11; Mik. 4:1-3) Tlhandlakambirhi, dyondzo ya Xikwembu yi nyike timiliyoni ta vanhu xivindzi xo tshika mikhuva leyi Xikwembu xi yi vengaka leyi a yi dzime ni timitsu.—1 Kor. 6:9-11.
4 Xivangelo Xo Va Vanhu Va Fanele Va Yi Kuma Sweswi: Muleteri wa hina Lonkulu u hi lemukisa hi nkarhi lowu hi hanyaka eka wona. Swiboho swa yena swa vuavanyisi leswi a swi profeteke swi tamele rungula leri faneleke ri twarisiwa emisaveni hinkwayo. (Nhlav. 14:6, 7) Kreste wa fuma etilweni, mfumo wa misava hinkwayo wa vukhongeri bya mavunwa wu ta lovisiwa ku nga ri khale, kutani Mfumo wa Xikwembu wu ta lovisa mimfumo hinkwayo emisaveni. (Dan. 2:44; Nhlav. 11:15; 17:16) Hikwalaho vanhu va fanele va hatla va tiva hi Hosi ya Xikwembu leyi fumaka sweswi, leswaku va ta huma eBabilona Lonkulu kutani va vitana vito ra Yehovha hi ripfumelo. (Ps. 2:11, 12; Rhom. 10:13; Nhlav. 18:4) Onge hi nga hlanganyela hi xitalo hilaha hi nga kotaka hakona eku dyondziseni van’wana hi ta dyondzo leyi nyikaka vutomi.