‘Ndzi Landzeleni Nkarhi Hinkwawo’
1 Vanhu vo tala va hanyela ku titsakisa kambe minkarhi yo tala va va va nga tsakanga. Ematshan’weni ya leswaku Yesu a khutaza vanhu ku hanyela ku titsakisa, u vule leswaku munhu a nga kuma ntsako wa xiviri loko a nyika hi ndlela leyi nga riki ya vutianakanyi. (Mint. 20:35) U te: “Loko munhu a lava ku ndzi landzela, a a titshike kutani . . . a ndzi landzela nkarhi hinkwawo.” (Mar. 8:34) Leswi a swi vuli ku va munhu a titsona mintsako hi minkarhi yin’wana ntsena. Kambe swi vula ku va hi hanyela ku tsakisa Yehovha siku ni siku ku nga ri ku titsakisa hina vini.—Rhom. 14:8; 15:3.
2 Xiya xikombiso xa muapostola Pawulo. Hikwalaho ka “ntikelo lowu tlurisaka wa ku tiva Kreste Yesu,” Pawulo u tshike ku hlongorisa swilo leswi a a swi navela kutani a tinyiketela eku chumayeleni ka rungula ra Mfumo. (Filp. 3:7, 8) U te: “Loko ku ri mina ndzi ta tirhisa hinkwaswo leswi ndzi nga na swona hi ku tsaka naswona ndzi ta tirhisiwa hi ku helela” leswaku ndzi pfuna van’wana. (2 Kor. 12:15) Un’wana ni un’wana wa hina u fanele a tivutisa leswi: ‘Xana ndzi wu tirhisa njhani nkarhi wa mina, matimba ya mina, vuswikoti bya mina ni mali ya mina? Xana ndzi dzikise mbilu ya mina eku titsakiseni, kumbe ndzi lava ku tsakisa Yehovha?’
3 Tindlela Leti Hi Nga Nyikaka Ha Tona: Lembe na lembe, vanhu va Xikwembu va tirha tiawara leti tlulaka biliyoni entirhweni wa ku chumayela hi Mfumo lowu ponisaka vutomi bya vanhu. Evandlheni, lavakulu ni lavatsongo va endla swiavelo swo hambana-hambana leswi vuyerisaka van’wana. Nakambe ku ni ntirho wo tala lowu endliwaka loko ku lunghiseleriwa tinhlengeletano ni mintsombano kun’we ni ku aka ni ku lunghisa miako leyi tirhiseriwaka ku ndlandlamuxa vugandzeri bya ntiyiso. Kasi ku ni mpfuno wa rirhandzu wa vamakwerhu lava nga eka Tikomiti to Vulavurisana ni Swibedlhele ni Mintlawa leyi Endzelaka Vavabyi. Matshalatshala wolawo hinkwawo ya ku rhangisa swilaveko swa van’wana i nkateko eka vamakwerhu hinkwavo lava nga Vakreste!—Ps. 110:3.
4 Hi pfulekeriwa hi tindlela to hambana-hambana leti hi nga hoxaka xandla ha tona eku nyikeni loko vamakwerhu va humeleriwe hi mhangu kumbe loko va tshuka va lava mpfuno wa xihatla. Kambe na hina minkarhi yo tala ha n’wi vona makwerhu loko a lava mpfuno kumbe xikhutazo. (Swiv. 17:17) Loko hi hatla hi pfuna van’wana ni ku chumayela rungula ra Mfumo, hi va hi ri karhi hi landzela xikombiso xa Yesu. (Filp. 2:5-8) A hi hambeteni hi tikarhatela ku endla tano.