Khathalela Van’wana—Hi Ku Va Ni Nsovo
1 “Yehovha u ni nsovo.” (Ps. 145:8) Hambileswi a nga Hosi ya Vuako Hinkwabyo, u ni musa, wa anakanyela naswona u ni vunene loko a ri karhi a tirhisana ni vanhu lava nga hetisekangiki. (Gen. 13:14; 19:18-21, 29) Hi nga endla leswaku vanhu va tsakela mahungu lamanene hi ku tekelela Xikwembu xa hina lexi nga ni nsovo. (Kol. 4:6) Leswi a swi vuli ku vulavula hi ndlela yo rhula ni hi xichavo ntsena.
2 Hi Yindlu Ni Yindlu: Ku vuriwa yini loko hi fika ekaya ra munhu hi nkarhi lowu nga riki wunene kumbe hi n’wi kuma a khomeke ngopfu lerova a nga swi koti ni ku bula na hina? I swinene ku xiya swiyimo swo tano ivi hi komisa bulo ra hina kumbe hi n’wi byela leswaku hi ta tlhela hi vuya nkarhi wun’wana. A hi lavi ku sindzisa vanhu leswaku va teka tibuku hambiloko va nga ti lavi. Ku ehleketelela vanhu swi ta hi susumetela ni ku xixima tindlu ta vona, hi ku va hi pfala tigede ni minyangwa ya vona ni ku dyondzisa vana va hina leswaku na vona va endla tano. Hi fanele hi tiyiseka leswaku minkandziyiso yihi na yihi leyi hi yi siyaka emakaya lama nga riki na munhu, a hi yi siyi erivaleni lerova yi voniwa hi vahundzi va ndlela. Hakunene, nsovo wu ta hi susumetela ku khoma van’wana hi ndlela leyi hi lavaka leswaku va hi khoma ha yona.—Luka 6:31.
3 Loko Hi Fambisa Timagazini eXitarateni: Loko hi ri karhi hi fambisa timagazini exitarateni, hi nga kombisa ku va ni xichavo hi ku ka hi nga yimi hi pfala ndlela naswona hi nga fumbani emahlweni ka switolo swa vanhu. Hi ta xiya swiyimo swa vanhu van’wana, hi vulavula ni vanhu lava nga jahangiki hi tshika lava jaheke. Minkarhi yin’wana swi nga ha lava hi vulavulela ehenhla leswaku va hi twa kahle loko ku ri ni pongo. Kambe hi fanele hi vulavula hi ndlela leyi xiximekaka, ku nga ri ku tlatlarhuka lerova hi tivangela mahlo ya vanhu.—Mat. 12:19.
4 Loko Hi Chumayela Hi Riqingho: Ku anakanyela vanhu swi ta hi endla leswaku loko hi chumayela hi riqingho hi nga ri bi hi ri endhawini leyi nga ni pongo. Nakambe hi kombisa mahanyelo lamanene loko hi hatlisa hi titivisa ni ku hlamusela xivangelo xa ku va bela riqingho rero. Loko hi tshinete riqingho kahle enon’wini naswona hi vulavula hi rito leri kombaka leswaku hi tsakile swi ta endla vanhu va tsakela bulo ra hina ra Matsalwa leri akaka. (1 Kor. 14:8, 9) Loko hi ri ni musa, hi anakanyela ni ku xixima vanhu hi tindlela leti to hambana-hambana, hi va hi tekelela Yehovha Xikwembu xa hina lexi nga ni nsovo.