Ntirho Wa Hina Wo Chumayela—Wu Lava Hi Va Ni Ntwela-vusiwana

¹ Yesu u swi xiyile leswaku mintshungu leyi a yi yingisele rungula ra yena a yi “vavisiwile ni ku tsalangana ku fana ni tinyimpfu leti nga riki na murisi.” (Mat. 9:36) Hikwalaho ka ntwela-vusiwana wa yena ni rirhandzu, u yi dyondzise tindlela ta Yehovha, a yi chavelela a tlhela a enerisa swilaveko swa yona swa moya. Loko hi ri karhi hi anakanyisisa hi tindlela ta yena, hi dyondza ku anakanya ni ku titwa hilaha Yesu a a titwa hakona, naswona mfanelo leyi ya ntwela-vusiwana ya vonaka loko hi ri entirhweni wa hina wo chumayela.

² Wa nga ehleketa ndlela leyi Yesu a anguleke ha yona loko vanhu lava heleriweke hi ntshembo va ta eka yena. (Luka 5:12, 13; 8:43-48) A a anakanyela lava lavaka ku pfuniwa hi ndlela yo hlawuleka. (Mar. 7:31-35) A a yi tiva ndlela leyi vanhu va titwaka ha yona kutani a a va khathalela. A a languta leswi nga etimbilwini ta vona. (Luka 7:36-40) Hakunene, Yesu u kombise ntwela-vusiwana wa Xikwembu xa hina.

³ ‘A A Ri Ni Ntwela-vusiwana’: Yesu a a nga chumayeleli ku hetisisa nawu ntsena, kambe a ku ri hikwalaho ka ‘ntwela-vusiwana’ wa yena. (Mar. 6:34) Hilaha ku fanaka ninamuntlha, rungula leri na hina hi ri chumayelaka a hi endleli ku hetisisa nawu ntsena kambe hi ringeta ku ponisa vanhu hikuva vutomi bya vona i bya risima. Hi fanele hi lava ku tiva leswi endlaka vanhu va angula hi ndlela leyi va angulaka ha yona. Xana va vilerisiwa hi yini? Xana varhangeri va vukhongeri bya mavunwa a va na mhaka na vona naswona va va kanganyisa? Loko hi va tsakela hi mbilu hinkwayo sweswo swi ta va endla leswaku va lava ku yingisela mahungu lamanene.—2 Kor. 6:4, 6.

⁴ Ku va ni ntwela-vusiwana swi khumba timbilu ta vanhu. Hi xikombiso: Wansati un’wana u feriwe hi xinhwanyetana xakwe xa tin’hweti tinharhu. Loko Timbhoni timbirhi ti gongondza ekaya rakwe, u ti amukerile leswaku a ta ti byela xo mita hi huku hikwalaho ka leswi ti swi vulaka loko ti hlamusela xivangelo xo va Xikwembu xi pfumelele ku xaniseka. Hambiswiritano, endzhaku ka nkarhi wansati loyi u te: “Ti ndzi yingiserile ti ri ni ntwela-vusiwana lowukulu, loko se ti famba a ndzi titwa ndzi antswa swinene lerova ndzi pfumela leswaku ti tlhela ti vuya.” Xana u tikarhatela ku va ni ntwela-vusiwana eka un’wana ni un’wana loyi u hlanganaka na yena ensin’wini?

⁵ Ku hlakulela ku va ni ntwela-vusiwana swi ta hi pfuna leswaku hi kota ku chavelela van’wana. Loko hi endla tano hi kwetsimisa Yehovha, “Tatana la nga ni tintswalo letikulu.”—2 Kor. 1:3.