Hinkwerhu Hi Nga Hoxa Xandla eNtirhweni Wo Endla Vadyondzisiwa

¹ Munhu u va mudyondzisiwa hikwalaho ka matshalatshala ya vamakwerhu vo tala ku nga ri un’we ntsena. Yehovha a nga va tirhisa hinkwavo “vatirhi-kulobye” na yena leswaku va pfuna swichudeni swa Bibele swi kula emoyeni. (1 Kor. 3:6-9) Ha un’we wa hina u pfuna lava ha ku sungulaka ku hlanganyela, hi tinhlamulo ta yena leti humaka embilwini loko a ri eminhlanganweni ya hina ya Vukreste ni hi mahanyelo ya yena lamanene, lama swi vekaka erivaleni leswaku moya wa Xikwembu wa tirha evuton’wini bya yena. (Yoh. 13:35; Gal. 5:22, 23; Efe. 4:22, 23) I yini swin’wana leswi nga endliwaka ku pfuna lava ha ku sungulaka ku hlanganyela?

² Tanihi Vandlha: Hinkwerhu ka hina hi fanele hi tsakela lava sungulaka ku ta eminhlanganweni hi ku va xeweta hi rirhandzu ni ku bula na vona loko mihlangano yi nga si sungula ni loko yi hela. Loko wanuna un’wana a hlamusela leswi endlekeke hi siku ro sungula loko a ye evandlheni, u te: “Siku rero ndzi vonane ni vanhu lava ndzi nga va tiviki nikatsongo kambe lava nga ni rirhandzu ra xiviri ku tlula lava a ndzi va tiva ekerekeni leyi ndzi kuleleke eka yona. A swi ri erivaleni leswaku se ndzi wu kumile ntiyiso.” Loko se a ri ni tin’hweti ta nkombo a ri karhi a hlanganyela u khuvuriwile.

³ Bumabumela xichudeni xa Bibele loko xi ri karhi xi endla nhluvuko hi tlhelo ra moya. Xana xichudeni xa Bibele xi tiyisela nkaneto? Xana xi va kona eminhlanganweni nkarhi hinkwawo? Xana xi na xona xivindzi xo hlamula? Xana xi tsarisile eka Xikolo xa Vutirheli bya le Tilweni kumbe se xi sungurile ku huma nsimu? Xi bumabumele hi nhluvuko lowu se xi wu endleke. Leswi swi ta xi khutaza ni ku xi phyuphyisa.—Swiv. 25:11.

⁴ Tanihi Mufambisi Wa Dyondzo Ya Bibele: Vahuweleri van’wana va kote ku pfuna lava va dyondzaka na vona Bibele leswaku va tolovelana ni swirho swa vandlha hi ku va va kombela vahuweleri van’wana leswaku va famba na vona eka swichudeni swa vona swa Bibele. U nga ha yima-yimi, rhambela xichudeni xa wena eminhlanganweni ya vandlha. Loko xi sungula ku ta eminhlanganweni, tiyiseka leswaku u xi tivisa eka lavan’wana. Xana xi lwisana ni ku tshika mukhuva wo karhi wo biha, wo tanihi ku dzaha? Xana ekaya ku ni loyi a lwisanaka ni ku dyondza ka xona Bibele? Xi nga ha vuyeriwa hi ku va xi vulavula ni muhuweleri loyi a langutaneke ni mphikamakaneta yo tano a tlhela a yi hlula.—1 Pet. 5:9.

⁵ Lava ha ku sungulaka ku hlanganyela va lava ku seketeriwa hi vandlha. Hinkwerhu hi nga va pfuna leswaku va endla nhluvuko hi ku va rhandza.