Ku Gandzela Yehovha Mi Ri Ndyangu
1 Eminkarhini ya ku tsariwa ka Bibele, swirho swa ndyangu a swi endla swilo swo tala swin’we. A swi tirha mintirho ya siku ni siku swin’we kasi xa nkoka ngopfu a swi gandzela Yehovha hi ndyangu. (Lev. 10:12-14; Det. 31:12) Namuntlha etindhawini to tala a swa ha talanga swilo leswi swirho swa mindyangu swi swi endlaka swin’we. Hambiswiritano, Vakreste va swi tiva leswaku i swa nkoka ku endla swilo hi ndyangu, ngopfu-ngopfu loko swi ta emhakeni ya vugandzeri. A swi kanakanisi leswaku Musunguri wa ndyangu wa tsaka loko a vona mindyangu yi n’wi gandzela hi vun’we!
2 Chumayelani Swin’we: Ku chumayela swin’we mahungu lamanene swi tiyisa vun’we bya ndyangu. Hikwalaho, nkulu la chumayelaka swin’we ni vahuweleri van’wana evandlheni u fanele a tlhela a chumayela swin’we ni nsati ni vana vakwe. (1 Tim. 3:4, 5) Hambileswi valanguteri va swifundzha ni va miganga va tshamaka va khomekile, va hlela nkarhi wo tirha nsimu swin’we ni vasati va vona.
3 Vatswari lava chumayelaka swin’we ni vana va vona va kota ku va pfuna leswaku va endla nhluvuko tanihi vachumayeri. Vana va ta xiya ntsako wa vatswari va vona ni ndlela leyi va yi rhandzaka ha yona nsimu va tlhela va vona ndlela leyi va ri phofulaka ha yona rirhandzu ra vona ha Yehovha ni hi vanhu-kulobye. (Det. 6:5-7) Ku va vatswari va chumayela swin’we ni vana va vona swa ha ri swa nkoka niloko se va kulakurile. Mpatswa wun’wana lowu nga ni majaha manharhu lama nga ni malembe ya le xikarhi ka 15 na 21 wu hambeta wu tirha swin’we na wona. Tata wa wona u te: “Nkarhi wun’wana ni wun’wana ku ni leswi hi ma dyondzisaka swona. Naswona hi endla leswaku ma tsakela nkarhi wolowo naswona ma khutazeka.”
4 Lunghiselelani Swin’we: Mindyangu yi kume leswaku ya vuyeriwa loko yi swi lunghiselela swin’we leswi yi nga ta swi vula ensin’wini. Minkarhi yo tala vana va rhandza ku titoloveta swingheniso ni swirho swa ndyangu va ri karhi va cincana un’wana a va n’wini wa muti kumbe a va muhuweleri. Loko dyondzo ya ndyangu yi hela van’wana va teka timinete ti nga ri tingani va endla sweswo.
5 Hi tshama hi ri karhi hi khapakhapa hi ntsako loko hi hlanganyela swin’we ni mindyangu ya hina emintirhweni ya nkoka leyi enerisaka. Mawaku ndlela leyi swi tsakisaka ha yona loko swirho swa mindyangu swi tirha swin’we hi yindlu ni yindlu ni ku endla maendzo yo vuyela ni ku fambisa tidyondzo ta Bibele! Xisweswo loko u ri karhi u gandzela Yehovha swin’we ni ndyangu wa wena hi ntsako, u nga ku: “Loko ku ri mina ni vandyangu wa mina, hi ta tirhela Yehovha.”—Yox. 24:15.