Ndlela Leyi Swirho Swa Ndyangu Swi Tirhisanaka Ha Yona Leswaku Swi Hlanganyela Hi Xitalo—Evutirhelini
1 I yini xin’wana lexi nga tsakisaka ku tlula ku vona vavanuna ni vavasati, vatswari ni vana va tirha swin’we evutirhelini bya Vukreste, va dzunisa vito ra Yehovha erivaleni? (Ps. 148:12, 13) Mindyangu hinkwayo yi fanele yi va ni xiyimiso lexinene xa ku hlanganyela nkarhi na nkarhi evutirhelini bya nsimu. Xana ndyangu wa wena wu na rona siku leri wu ri vekeleke ku ya evutirhelini? Loko swi ri tano, un’wana ni un’wana wa swi tiva leswi a faneleke a swi kunguhata naswona a nga hlanganyela hi xitalo.—Swiv. 21:5a.
2 Emahlweni ka siku ra ntirho ra ndyangu, swi nga va njhani loko mo hlangana ndhawu yin’we leswaku mi lunghiselela swingheniso leswi ndyangu wa n’wina wu nga ta swi tirhisa? Ku titoloveta swingheniso swi nga mi pfuna swinene naswona swi nga khutaza moya wa ntirhisano endyangwini. Mayana ndlela leyi swi vuyerisaka ha yona loko vutirheli bya nsimu byi va mhaka leyi khumbaka ndyangu naswona swirho hinkwaswo swa ndyangu swi va swi lunghiselele kahle!
3 Mulanguteri un’wana wa xifundzha u fambe ni ndyangu hinkwawo entirhweni wa timagazini. Loko a ri karhi a tirha ni un’wana wa vanhwanyana va ndyangu lowu u vutisile: “Xana hi ta tirha swin’we nkarhi wo tanihi kwihi?” N’wana loyi u hlamusele leswaku u lava ku ya tirha ni tata wakwe loko va heta. Swi le rivaleni leswaku n’wana loyi ni tata wakwe va tiphina loko va tirha swin’we. Mawaku moya lowunene swonghasi endyangwini!
4 Mindyangu yin’wana yi nga swi kota ku nghenela vuphayona bya nkarhinyana bya n’hweti yin’we elembeni. Kumbexana swi nga koteka leswaku xirho xin’we xa ndyangu xi hambeta xi tirha tanihi phayona ra nkarhinyana kumbe hambi ku ri ku nghenela vuphayona bya nkarhi hinkwawo. Hi ku hlela kahle ni ku va ni ntirhisano, swi nga endleka leswaku swirho hinkwaswo swa ndyangu swi swi kota ku engetela vutirheli bya munhu hi xiyexe evutirhelini hi ku seketela la phayonaka. Ndyangu wu ta katekisiwa hikwalaho ka vutirheli lebyi engetelekeke ni ku kuma mintokoto leyinene leyi kumiwaka evutirhelini bya nsimu.—Mal. 3:10.
5 Ku hlanganyela hi xitalo entirhweni wa evhangeli ku ta pfuna mindyangu leswaku yi va ni vun’we, yi hiseka, yi humesa mihandzu ni ku va ni ntsako entirhweni wa Yehovha!—Ringanisa Vafilipiya 2:1, 2.