“Xana Ndzi Fanele Ndzi Endla Yini?”
1 Tanihi muntshwa la kulaka, u nga ha tivutisa, ‘Xana ndzi fanele ndzi endla yini hi vutomi bya mina?’ Vantshwa va Vakreste va lava ku endlela Yehovha ntirho lowu engetelekeke evutirhelini. Kambe, xana u nga swi kotisa ku yini ku endla leswi loko hi tlhelo u ri karhi u byarha vutihlamuleri bya ku va muntshwa la kulaka, lebyi katsaka ku va u tiwundla? Swi nga ha ku tikela ku kuma nhlamulo.
2 Vantshwa van’wana va karhateka loko va vona xiyimo xa misava xa ikhonomi kumbe loko va anakanya hi leswi vumundzuku byi va khomeleke swona. Va tivutisa: ‘Xana ndzi fanele ku kuma dyondzo ya misava leyi engetelekeke? Xana ndzi fanele ku nghenela vutirheli bya nkarhi hinkwawo hi nomu lowu?’ Leswaku a endla xiboho lexi faneleke, munhu u fanele a xi hlamula kahle xivutiso lexi nge, ‘I yini lexi nga xa nkoka ngopfu evuton’wini bya mina?’ U fanele a kambisisa minsusumeto yakwe.
3 Hi wihi nchumu wa nkoka lowu u wu hlakuleleke evuntshweni bya wena? Xana u tsakisiwa ngopfu hi ku kuma mali, kumbe hakunene u lava ku hanyela ku rhangisa swilaveko swa Mfumo? Ku kuma digri ya le yunivhesiti a swi vuli swona leswaku u ta wu kuma ntirho. Tanihi yin’wana ya tindlela leti pfunaka, van’wana va dyondze vutshila bya risima lebyi lavekaka entirhweni hi ku pfuniwa hi swikimu swo dyondzisa mintirho, van’wana va dyondze mintirho ya mavoko kumbe ya vuthekiniki leyi dyondzisiwaka exikolweni kumbe tidyondzo ta le kholichi to koma leti lavaka ku tikarhata ni nkarhi wutsongo.
4 Tshemba Leswi Yehovha A Swi Vulaka: Mhaka ya nkoka leyi hi faneleke ku yi tsundzuka i xitiyisekiso xa Yehovha Xikwembu xa leswaku u ta va wundla lava rhangisaka timhaka ta Mfumo. (Mat. 6:33) Xitshembiso lexi a hi xa matlangwana. Vamakwerhu vo tala lava yaka eXikolweni xa Ndzetelo wa Vutirheli va kume tidigri ta le kholichi va nga si dyondza ntiyiso. Hambiswiritano, xana a va endla ntirho wihi wa ku tihanyisa? A hi vangani lava a va endla ntirho lowu va dyondzeleke wona. Vunyingi bya vona a va tirha mintirho ya ku lunghisa, a va swi kota ku khathalela swilaveko swa vona swa timali loko va ri karhi va phayona. Hi ku endla ntirho lowu engetelekeke evutirhelini, va kuma mikateko leyi tlulaka mali.
5 Loko u endla xiboho xa leswi u nga ta swi endla endzhaku ka loko u pasile exikolweni xa le henhla, kambisisa swiyimo ni minsusumeto ya wena hi vukheta. Leswaku u kota ku tihlawulela kahle, kambisisa rungula leri kumekaka eka Xalamuka! ya March 8, 1998, matluka 26-28. Vulavula ni vatswari va wena, vakulu, mulanguteri wa n’wina wa xifundzha ni maphayona lama humelelaka endhawini ya ka n’wina. Sweswo swi ta ku pfuna leswaku u endla xiboho xa vutlharhi malunghana ni leswi u faneleke u swi endla evuton’wini bya wena.—Ekl. 12:1, 13.