Nongonoko Lowuntshwa Wa Siku Ra Nhlengeletano Yo Hlawuleka

Nhloko-mhaka ya nongonoko wa siku ra nhlengeletano yo hlawuleka ya lembe ra ntirho ra 2008 yi ri “Hina Hi Vumba—Yehovha I Muvumbi Wa Hina,” yi sekeriwe eka Esaya 64:8. Ndzayo ya Matsalwa leyi hi nga ta yi kuma eka nongonoko lowu yi ta hi endla leswaku hi hambeta hi byi tlangela swinene vutlhari bya Yehovha, vululami byakwe, matimba yakwe ni rirhandzu rakwe tanihi Muvumbi Lonkulu.

Nkulumo ya mulanguteri wa xifundzha leyi nge “Ku Tirha Tanihi Swibya Leswi Xiximekaka eVutirhelini,” yi ta komba ndlela leyi vanhu vo tala va hambetaka va katekisiwa ha yona hi ku tiva ntiyiso ni hi ku wu byela van’wana. Nkulumo leyi nge “Ku Anakanyisisa Swi Ta Ku Sirhelela,” yi ta kombisa ndlela leyi ku anakanyisisa swinene hi misinya ya milawu yo lulama ya Yehovha swi hi sirhelelaka ha yona. Xivulavuri lexi nga endza xi ta vulavula hi nhloko-mhaka leyi nge “Hi Nga ‘Titwananisi Ni Mafambiselo Lawa Ya Swilo’” ni leyi nge “Pfumela Ku Kongomisiwa Hi Muvumbi Lonkulu.” Vatswari ni vana va ta khutaziwa hi tinkulumo leti nge “Vantshwa Lava Tirhelaka Yehovha” ni leyi nge “Ntirho Wa Risima Wa Vatswari Wa Ku Kurisa Vana.” Eka minkombiso ni mimbulavurisano leyi nga ta va kona hi ta tiphina hi ku vona ni ku twa leswi vamakwerhu va swi endlaka ensin’wini. Lava va tsakelaka ku kombisa ku tinyiketela ka vona eka Xikwembu hi ku khuvuriwa ematini va fanele va hatlisa va tivisa mulanguteri la ungamelaka. U nga rivali ku ta ni Xihondzo xo Rindza lexi nga ta dyondziwa eka vhiki ra siku ra nhlengeletano yo hlawuleka.

Xin’wana ni xin’wana lexi Muvumbi Lonkulu a tiyimiseleke ku xi endla wa xi hetisisa. Kambe swi le ka un’wana ni un’wana wa hina ku tihlawulela ndlela leyi hi nga ta angula ha yona loko a hi komba ndlela. Lava hi vutlhari va titsongahatelaka milawu ya Yehovha ni switsundzuxo swa yena, va ta hundzuriwa swibya swa nkoka ku fana ni vumba lebyi tsakamaka lebyi nga emavokweni ya muvumbi lebyi a vumbaka nchumu wo karhi ha byona a tlhela a wu sasekisa kutani wu hundzuka xibya lexi tirhisekaka. Loko hi yingisa Yehovha hi va hi ri eku twariseni ka vuhosi byakwe naswona hi kuma mikateko yo tala.