Nongonoko Lowuntshwa Wa Siku Ra Nhlengeletano Yo Hlawuleka
Nhloko-mhaka ya nongonoko wa siku ra nhlengeletano yo hlawuleka ya lembe ra ntirho ra 2009 yi ri ‘Tshamani Mi Ri Karhi Mi Languta Vutirheli, Leswaku Mi Byi Hetisisa,’ yi sekeriwe eka Vakolosa 4:17. Tanihi Vakreste hi xi teka xi ri xa nkoka xikhutazo lexi. Xikongomelo xa hina i ku chumayela hi ku tshembeka hilaha Yesu a endleke ha kona. (Yoh. 17:4) Muapostola Pawulo u hi vekele xikombiso lexinene ngopfu emhakeni leyi. A a tiyimisele ku heta pfhumba rakwe a ri karhi a endla ntirho wo chumayela.—Mint. 20:24.
Mulanguteri wa xifundzha u ta nyikela nkulumo leyi nga ta kombisa ndlela leyi vahuweleri vo hambana-hambana va swi hluleke ha yona swiphiqo ensin’wini. Nkulumo leyi nge “Vuyela Eka Lava U Va Endzeleke” yi ta kandziyisa ndlela leyi hi nga va pfunaka ha yona lava va nga ni “mboyamelo lowunene eka vutomi lebyi nga heriki.” (Mint. 13:48) Xivulavuri lexi hi endzeleke xi ta rhanga hi ku hlamusela ndzima ha yin’we ya Vakorinto va Vumbirhi 6:1-10, eka nkulumo leyi nge “Ndlela Leyi Hi Tibumabumelaka Ha Yona Tanihi Vachumayeri.” Nindzhenga xivulavuri xexo xi ta veka nkulumo leyi nga ni nhloko-mhaka leyi nge “Teka Ntirho Wa Wena Wo Chumayela Wu Ri Wa Risima Swinene.” A swi kanakanisi leswaku u ta vuyeriwa swinene eka nkulumo leyi nge “Vantshwa Na N’wina Lavakulu, Tiphineni Hi Ntirho Wa Nsimu” ni leyi nge “Vantshwa Lava Endlaka Ntirho Wa Vona Wo Chumayela Hilaha Ku Heleleke.” Lava va navelaka ku kombisa ku tinyiketela ka vona hi ku khuvuriwa ematini eka yin’wana ya tinhlengeletano leti nga ta landzela va fanele va tivisa mulanguteri la ungamelaka hi ku hatlisa. Xiyenge xin’wana lexi nga xa nkoka etinhlengeletanweni ni le mintsombanweni ya hina i dyondzo ya Xihondzo xo Rindza. Tana ni xa wena lexi nga ta va xi dyondziwa hi vhiki ra nhlengeletano yo hlawuleka.
Loko hi ri karhi hi chumayela hi tikarhatela leswaku mintirho yin’wana ya hina yi nga hi dyeli nkarhi wo endla ntirho lowu Yehovha a hi nyikeke wona. Xikhutazo lexi humaka eMatsalweni lexi hi nga ta xi kuma enhlengeletanweni leyi ya siku ro hlawuleka, xi fanele xi hi pfuna leswaku hi twisisa leswi hi faneleke hi swi endla leswaku hi tshama hi ri karhi hi anakanya hi nsimu ni ku engetela nkarhi lowu hi wu hetaka hi ri eku chumayeleni.