Bokisi Ra Swivutiso

◼ Xana swi fanerile leswaku Mbhoni ya Yehovha yi tshunguriwa ni ku khathaleriwa exibedlhele lexi lawuriwaka hi vukhongeri byo karhi?

Ku ni vukhongeri byo hambana-hambana lebyi nga ni swibedlhele kumbe makaya yo khathalela vavabyi. Hi ntolovelo tindhawu to tano a ti endliwanga hi xikongomelo xo seketela Babilona Lonkulu. (Nhlav. 18:2, 4) Eku sunguleni vukhongeri byi nga ha va byi ake tindhawu leti hi xikongomelo xo endla mali. Namuntlha, swibedlhele swo tala swo va swa vukhongeri hi vito ntsena, kasi swin’wana swa ha ri ni vatirhi va nga ri vangani, lava nga swirho swa vukhongeri byebyo.

Loko Mbhoni ya Yehovha yi lava ku ya exibedlhele kumbe ekaya ro khathalela vavabyi, leri lawuriwaka hi vukhongeri byo karhi, yi fanele yi tiendlela xiboho xa yona n’wini. Ripfalo ra un’wana ri nga ha n’wi pfumelela ku ya kambe ra un’wana ri n’wi alela. (1 Tim. 1:5) Ku ni swiyimo swo karhi leswi munhu a faneleke a swi kambisisa a nga si endla xiboho naswona i swinene ku swi kambisisa.

Hi xikombiso, ku nga ha va ku nga ri na xibedlhele kumbe kaya rin’wana ro khathalela vavabyi ekusuhi, handle ka leri lawuriwaka hi vukhongeri. Kumbe, ku nga ha va ni xibedlhele xin’wana ekusuhi, kambe lexi lawuriwaka hi vukhongeri ku ri xona ntsena lexi tshungulaka ku antswa, kumbe ku ri xona ntsena lexi nga ni dokodela la kotaka ku tshungula vuvabyi bya wena. Kasi, minkarhi yin’wana swibedlhele leswi lawuriwaka hi vukhongeri swi nga ha xixima xiboho xa wena xa ku ala ku pomperiwa ngati tanihi Mukreste, kasi leswin’wana swa mfumo kumbe leswi nga riki swa mfumo swi nga xi xiximi. Kutani leswi i swin’wana swa swiyimo leswi u faneleke u swi anakanyisisa u nga si endla xiboho xa leswaku u ta tshunguriwa kwihi.

Loko u endla xiboho xo ya tshunguriwa exibedlhele kumbe ekaya ro khathalela vavabyi, leri lawuriwaka hi vukhongeri, u nga ha teka ntirho lowu va ku endleleke wona tanihi bindzu leri tolovelekeke, leswi vulaka leswaku a wu seketeli vukhongeri bya mavunwa hi ku tshunguriwa exibedlhele kumbe hi ku khathaleriwa ekaya ra vona ra vavabyi. U ta va u hakelela ntsena ntirho lowu va ku endleleke wona.

Kambe, tanihi Mukreste u fanele u tiyiseka leswaku u nga tshuki u hlanganyela eka xin’wana ni xin’wana lexi khumbaka vukhongeri bya mavunwa. Nakambe, u nge vitani vatirhi va kwalaho hi swithopo swa vukhongeri swo kota leswi nge “Father” kumbe “Sister.” (Mat. 23:9) U fanele u tiyiseka leswaku ku ya ka wena eka ndhawu leyi u yele ku ya tshunguriwa ntsena ku nga ri swin’wana.

Loko u ya eka swibedlhele swoleswo, u fanele u va byela leswaku u Mbhoni ya Yehovha naswona u ta lava ku endzeriwa hi vakulu va le vandlheni. Ku endla tano swi ta endla leswaku u kota ku tiyisa vuxaka bya wena na Yehovha loko u ri kwalaho.—1 Tes. 5:14.

Loko ku ri ni vamakwerhu lava dyuhaleke lava khathaleriwaka etindhawini leti ku khathaleriwaka vadyuhari leti lawuriwaka hi vukhongeri, swirho swa ndyangu leswi nga Timbhoni, vakulu ni van’wana evandlheni va fanele va pfuna vamakwerhu lava leswaku va hambeta va tiyisa vuxaka bya vona na Yehovha. Ku khathalela vadyuhari lava swi ta va khutaza leswaku va nga tikumi va nghenele swilo swa vukhongeri kumbe minkhuvo yin’wana ya vukhongeri leyi talaka ku va kona eka tindhawu to tano.

Endzhaku ko anakanyisisa hi swiyimo leswi longoloxiweke laha henhla, un’wana ni un’wana wa hina u ta endla xiboho mayelana ni leswaku hi xihi xibedlhele lexi a nga ta xi tirhisa kumbe kaya ro khathalela vavabyi.—Gal. 6:5.