Mi Nga Va Rivali Lava Tshamaka eMakaya Ya Vadyuhari
1. Ha yini ku ri ni xilaveko xo chumayela mahungu lamanene eka lava tshamaka emakaya ya vadyuhari?
1 Vanhu vo tala va langutana ni vuyelo lebyi hetaka matimba lebyi vangiwaka hi ku dyuhala. (Ekl. 12:1-7) Vadyuhari van’wana va tshama emakaya ya vadyuhari, hikwalaho a hi minkarhi hinkwayo hi swi kotaka ku va fikelela loko hi chumayela hi yindlu ni yindlu. Leswi swi tano ni le matikweni lawa vatswari lava dyuhaleke hi ntolovelo va yaka va ya tshama ni vana va vona kumbe maxaka man’wana. Hambileswi kumbexana va nga swi kotiki kahle ku famba kumbe se va rivalaka, vadyuhari ni van’wana lava tshamaka emakaya ya vadyuhari va nga ha swi kota ku dyondza, ku twisisa ni ku rhandza Yehovha. Hi nga va fikelela njhani leswaku hi va chumayela mahungu lamanene ya “ntshembo wo tsakisa”?—Tito 2:13.
2. Hi nga wu kuma njhani nxaxamelo wa tindhawu leti vadyuhari va khathaleriwaka eka tona leswaku hi ta ti endzela?
2 Ndlela Leyi U Nga Sungulaka Ha Yona: Hi ntolovelo nxaxamelo wa tindhawu to khathalela vadyuhari wu nga kumiwa ebukwini leyi kombisaka tinomboro ta tinqingho ya le ndhawini yoleyo. Languta eka xiyenge lexi nge, “makaya ya vadyuhari.” Mulanguteri wa ntirho a nga rhangela eku hlawuleni ka vahuweleri lava fanelekaka leswaku va endzela tindhawu leti. Loko ku hleriwe hi ndlela leyinene ku tlhela ku tshembiwa Yehovha, hakanyingi swa koteka ku sungula ntlawa wa dyondzo ya Bibele.—Swiv. 21:5; 1 Yoh. 5:14, 15.
3, 4. (a) I mani loyi hi faneleke hi vulavurisana na yena loko hi lava ku sungula ntlawa wa dyondzo ya Bibele? (b) Hi nga ri hlamusela njhani lunghiselelo ro dyondza?
3 Ndlela leyi dyondzo yoleyo yi nga sunguriwaka ha yona yi titshege hi muxaka wa ndhawu ya kona. Etindhawini letikulu leti ku tshamaka vadyuhari vo tala ku tlhela ku va ni vatirhi vo tala, i swinene ku vulavurisana ni munhu loyi a amukelaka vaendzi a tlhela a hlamula tinqingho ivi hi kombela ku vulavula ni mulanguteri wa mintirho leyi endliwaka kwalaho. Emakaya ya vadyuhari laha ku tshamaka vadyuhari vatsongo ni vanhu vambirhi kumbe vanharhu lava va khathalelaka, swi nga va swinene ku veka nkarhi wo vulavurisana hi ku kongoma ni n’wini wa kaya rolero.
4 Eka swiyimo haswimbirhi, hlamusela leswaku u tirhisa nkarhi wa wena hi ku tirhandzela leswaku u khutaza vanhu lava tsakelaka ku hlaya ni ku bula hi timhaka ta le Bibeleni. Vutisa loko ku ri ni vadyuhari lava nga tsakelaka ku hlanganyela eku burisaneni hi Bibele tanihi ntlawa ku ringana 30 wa timinete hi vhiki. U nga ha tirhisa minkandziyiso yo hambana-hambana, kambe vo tala va kume leswaku buku leyi nge Buku Yanga Ya Timhaka Ta Bibele ni leyi nge Nghwazi Leyi Tshameke Yi Hanya ta rhandziwa. U nga ha komba mulanguteri wa ndhawu yoleyo minkandziyiso yoleyo. Siku, nkarhi ni ndhawu leyi ku nga ta hlanganiwa eka yona swi nga hleriwa na yena naswona hi ntolovelo swi ta namekiwa eka khalendara leyi nga ni mintirho leyi endliwaka ekaya ra vadyuhari. U nga chavi ku vula leswaku u Mbhoni ya Yehovha. Hi nkarhi lowu fanaka, pfuna mulanguteri yoloye ku twisisa leswaku u ta va u nga teli ku ta fambisa nhlangano wa vukhongeri, kambe u lava ku khutaza vanhu ku dyondza Bibele.
5. Hi swihi swiringanyeto leswi tirhaka leswi nga ta endla dyondzo yi va leyi tsakisaka yi tlhela yi vuyerisa?
5 Ndlela Yo Fambisa Dyondzo: Ndlela leyi u yi fambisaka ha yona dyondzo yi titshege hi swiyimo swa le ndhawini yoleyo, kutani pfumelelana ni swiyimo naswona u va ni vuxiyaxiya. Mufambisi wa dyondzo u fanele a ta ni minkandziyiso yo hlayanyana leyi nga ta dyondziwa naswona u fanele a tlhela a yi teka loko va heta ku dyondza. Swi nga ha lava leswaku a ta ni minkandziyiso ya marito lamakulu leswaku van’wana va ta yi tirhisa. Ku nga hlayiwa tindzimana, ku vutisiwa swivutiso naswona tinhlamulo ti nga nyikeriwa hi ndlela leyi tolovelekeke. Lava swi tsakelaka ni lava swi kotaka va nga ha komberiwa leswaku va hlaya tindzimana kumbe va hlaya tindzimana ta Bibele. Fambisa dyondzo hi ndlela leyi tsakisaka, vana ni langutelo lerinene ni xinghana. Loko mulanguteri wa mintirho leyi endliwaka kwalaho a pfumela, minkarhi yin’wana u nga va komba yin’wana ya tivhidiyo ta nhlengeletano leyi nga endlaka leswaku va tshemba Bibele kumbe leyi dyondzisaka hi rungula ro karhi ra le Bibeleni. Mi nga ha sungula ni ku pfala hi xikhongelo xo olova. Vahuweleri van’wana va dyondzise vadyuhari tinsimu ta Mfumo.
6. Loko mudyuhari un’wana a nga pfumelelani ni leswi mi hlayaka ha swona a nga pfuniwa njhani?
6 Ku vuriwa yini hi loko un’wana wa vadyuhari a nga pfumelelani ni swin’wana leswi hlayiweke kumbe leswi hlamuseriweke hi nkarhi wa dyondzo? N’wi hlamule hi vutlhari. (Kol. 4:6) Kumbexana u nga hlaya ndzimana yo koma ya le Bibeleni leyi nga ta xi tlhantlha kahle xiphiqo xa yena. Loko swi nga koteki ku endla tano, swi nga va swinene ku kombela ku bula na yena hi mhaka yoleyo mi ri n’wexe loko mi hete ku dyondza.
7. U nga endla yini loko mudyuhari un’wana a vutisa xivutiso kumbe a kombisa ku tsakela lokukulu?
7 Nkarhi wun’wana, mudyuhari wo karhi a nga ha vutisa xivutiso kumbe a vula leswaku u navela ku dyondza leswi engetelekeke. Makwerhu un’wana wa xisati u hlamula hi ndlela leyi: “Xolexo i xivutiso xa kahle. Kambe leswi xexo ku nga xivutiso xa wena n’wini, a hi yimenyana kukondza hi heta ku hlaya. Endzhaku ka dyondzo mina na wena hi ta bula hi xona.” Hakanyingi swa koteka ku hlela ku fambisa dyondzo ya Bibele ni vanhu lava tsakelaka hi nkarhi wun’wana endhawini yin’wana.
8. Ntlawa wa dyondzo ya Bibele ni dyondzo yin’wana ni yin’wana ya Bibele leyi vaka kona ti fanele ti vikiwa njhani?
8 Hi ntolovelo i swinene leswaku ntlawa wa dyondzo ya Bibele wu fambisiwa hi Timbhoni leti fanaka nkarhi hinkwawo. Vahuweleri lava hlanganyelaka eka dyondzo yoleyo va nga vika nkarhi wa kona. Loko mi kala mi sungula dyondzo, muhuweleri loyi a yi fambisaka a nga ha vika riendzo rin’we ro vuyela nkarhi na nkarhi loko a yi fambisa ni dyondzo yin’we ya Bibele n’hweti na n’hweti. Tidyondzo ta Bibele leti sunguriweke ni mudyuhari ha un’we loyi a kotaka ku twisisa ni ku dyondza ti nga vikiwa hi ndlela leyi tolovelekeke.
9, 10. Hi tihi timfanelo leti lava endlaka ntirho lowu va faneleke va va na tona? Hlamusela.
9 Tshama U Ri Karhi U Yi Fambisa: I swinene ku veka siku ni nkarhi wo dyondza ni ntlawa wolowo. Vadyuhari lava tshamaka kwalaho ni vatirhi va ta langutela leswaku yi fambisiwa nkarhi na nkarhi naswona yi sungula ni ku hela hi nkarhi. (Mat. 5:37) Hikwalaho, u fanele u tiyimisela, u hiseka u tlhela u hleleka. Ku vuriwa leswaku i swinene loko vahuweleri vambirhi lava fanelekaka va tirha swin’we leswaku va fambisa ntlawa wa dyondzo ya Bibele. (Ekl. 4:9, 10) Emakaya lamakulu ku nga ha laveka vahuweleri vo tala.
10 Nakambe i swa nkoka ku va ni xinghana ni ku kombisa leswaku wa va rhandza. (Filp. 2:4) Loko u va endzela ro sungula, tinyike nkarhi wo tiva munhu ha un’we wa lava teleke ku dyondza. Tsala mavito ya vona ehansi naswona u ringeta ku ma tsundzuka ku nga si fika riendzo ra wena leri landzelaka. Ku lehisa mbilu ni ku va ni ntwela-vusiwana swi ta endla leswaku un’wana ni un’wana a titwa a amukelekile ni ku xiximiwa.
11. Lava fambisaka dyondzo ya Bibele va fanele va swi kombisa njhani leswaku va xixima lava tirhaka kwalaho ni swirho swa mindyangu ya vadyuhari lava tshamaka kwalaho?
11 Nakambe i swa nkoka ku kombisa xichavo ni musa eka vanhu lava tirhaka kwalaho ni le ka swirho swa mindyangu ya vadyuhari lava tshamaka kwalaho. Loko dyondzo se yi hleriwile, ku ta va vutlhari ku nga cinci nkarhi kumbe ndlela leyi dyondzo yi fambisiwaka ha yona u nga rhanganga hi ku burisana ni mulanguteri wa mintirho leyi endliwaka kwalaho. Nkarhi na nkarhi n’wi kombele a hlamusela leswaku u yi vonisa ku yini ndlela leyi dyondzo yi fambisiwaka ha yona. Loko swirho swa mindyangu ya vadyuhari swi endza hi nkarhi wa dyondzo, swi xewete. Swi hlamusele xikongomelo xa dyondzo yoleyo ya Bibele. Swi tiyisekise leswaku wa xi rhandza xirho xa ndyangu wa swona. Swi kombele leswaku swi tshama swi yingisela.
12, 13. Hlamusela mintokoto leyi kombisaka vuyelo bya ku chumayela emakaya ya vadyuhari.
12 Vuyelo: Valanguteri va swifundzha ni va miganga ni mavandlha ma vika vuyelo lebyi khutazaka bya ku tirha ntirho lowu. Ekaya rin’wana ra vadyuhari, ku te vanhu va kwalomu ka 20 eka bulo ro sungula. Leswi swi endle leswaku ku dyondzeriwa vanhu va tsevu Bibele hi minkarhi yo hambana-hambana. Hi ku famba ka nkarhi un’wana u khuvuriwile. Dyondzo yin’wana leyi a yi fambisiwa ekaya rin’wana ra vadyuhari yi susumetele mukhegula loyi a a ri ni malembe ya 85 leswaku a hlanganyela ni vandlha ra kwalaho naswona u vule leswaku u navela ku khuvuriwa. Loko ekaya rin’wana ra vadyuhari va kunguhate ku hlanganisa mintirho leyi a yi endliwa kwalaho—leswi a swi ta endla leswaku ntlawa wa dyondzo ya Bibele leyi a yi fambisiwa hi Timbhoni ta Yehovha wu nga ha vi kona—vadyuhari va yile va ya vilela eka mulanguteri wa ndhawu yoleyo! Hi ku famba ka nkarhi dyondzo yi tlhele yi sunguriwa naswona a ku ta vanhu va 25 ku ya eka 30.
13 Rirhandzu leri hi ri kombisaka lava tshamaka emakaya ya vadyuhari a ri khumbi vona ntsena. Hi xikombiso, swi tolovelekile leswaku vanhu lava tirhaka kwalaho va tshama va yingisela hambi ku ri ku hlanganyela eka dyondzo. Matshalatshala lawa hi ma endlaka yo kombisa leswaku hi rhandza lava tshamaka emakaya ya vadyuhari ma tlhela ma nyikela vumbhoni lebyinene eka vanhu va le ndhawini yoleyo. (1 Pet. 2:12) Endzhaku ka loko mininjhere un’wana a hlamuseriwe xikongomelo xa dyondzo yoleyo, u te: “Ha yini mi nga tanga khale? Mi ta sungula rini?” Mulanguteri un’wana u tsale a ku: “Ndzi wu amukela hi mbilu hinkwayo ntlawa lowu wa dyondzo ya Bibele ekaya rin’wana ni rin’wana ra vadyuhari endhawini leyi. Timbhoni ta Yehovha ti endla ntirho lowu mahala tanihi xiphemu xa ntirho wa tona wo pfuna vanhu va le ndhawini leyi.” Kaya rin’wana ra vadyuhari ra le Hawaii ri nyike Timbhoni ta Yehovha Xitifiketi xo Endla Ntirho wo Tirhandzela, lexi hlamuselaka vatirhi volavo va ku tirhandzela tanihi “ndzalama ya risima swinene” eka lava tshamaka ekaya rolero ra vadyuhari.
14. Ha yini hi fanele hi teka goza ro pfuna lava tshamaka emakaya ya vadyuhari?
14 Yehovha u rhamba vadyuhari leswaku va n’wi dzunisa. (Ps. 148:12, 13) Xirhambo lexi xi katsa ni lava tshamaka emakaya ya vadyuhari. Xana ma kona makaya ya vadyuhari ensin’wini ya n’wina laha vadyuhari va nga ta vuyeriwa hi ku twa mahungu lamanene? Hi ku pfuniwa hi vakulu va kwalaho ni valanguteri va makaya ya vadyuhari, hi nga kota ku nyikela vumbhoni lebyinene eka lava tshamaka emakaya ya vadyuhari. Loko hi nga va rivali vadyuhari, hi tekelela Yehovha.—Ps. 71:9, 18.