Chavelela Lava Feriweke
1. Ha yini vanhu lava feriweke va lava nchavelelo?
1 Hi twa ku vava loko hi feriwa hi varhandziwa va hina, kambe swi vava ngopfu eka lava nga riki na wona ntshembo wa Mfumo. (1 Tes. 4:13) Vanhu vo tala va tivutisa va ku: ‘Ha yini vanhu va fa? Xana ku endleka yini hi vona loko va fa? Xana ndzi ta tlhela ndzi va vona?’ Eka tindzimana leti landzelaka ku ni swiringanyeto leswi hi nga swi tirhisaka ku pfuna lava hi hlanganaka na vona ensin’wini, lava feriweke hi maxaka ya vona kumbe vanghana va vona.—Esa. 61:2.
2. Loko n’wini wa muti a hi byela leswaku wa ha ku feriwa, xana hi fanele hi ya emahlweni hi n’wi chumayela?
2 Hi Yindlu Ni Yindlu: N’wini wa muti a nga hi byela leswaku ku loviwile laha kaya. Xana u vonaka a ri ni gome? Xana ku ni maxaka ya yena lama nga eku rileni? Loko swi ri tano, swi nga antswa leswaku hi tsema bulo ra hina. (Ekl. 3:1, 7) Hi nga n’wi byela leswaku hi rila na vona kutani hi n’wi nyika xiphephana, magazini kumbe broxara leyi faneleke kutani hi n’wi siya hi ku rhula. Kutani hi nga tlhela hi vuya hi nkarhi wun’wana leswaku hi ta va chavelela hi leswi Bibele yi swi vulaka.
3. Loko swiyimo swi pfumela, hi wahi matsalwa lawa u nga ma hlayelaka n’wini wa muti la ha ku feriwaka?
3 Minkarhi yin’wana hi nga ha kuma leswaku hi nga swi kota ku lehisa bula ra hina eka riendzo ro sungula. Hambileswi lowu ku nga riki wona nkarhi wa njhekanjhekisano mayelana ni rifu, hi nga va hlayela leswi Bibele yi swi tshembisaka hi ku pfuxiwa ka vafi. (Yoh. 5:28, 29) Kumbexana hi nga va byela leswi Bibele yi swi vulaka mayelana ni xiyimo lexi vafi va nga eka xona. (Ekl. 9:5, 10) Ku n’wi hlayela mhaka ya munhu la pfuxiweke eBibeleni, swi nga n’wi chavelela. (Yoh. 11:39-44) Xin’wana lexi u nga xi endlaka ku nga ha va ku kambisisa marito lama kombisaka ku tshemba Yehovha lama vuriweke hi Yobo wo tshembeka. (Yobo 14:14, 15) Loko u nga si famba u nga ha n’wi nyika broxara leyi nge Ku Humelela Yini Hi Hina Loko Hi Fa? ni leyi nge Loko U Feriwa Hi Loyi U N’wi Rhandzaka kumbe xiphephana xin’wana lexi faneleke. Kumbe hi nga ha n’wi nyika buku leyi nge Leswi Bibele Yi Swi Dyondzisaka, hi hlaya na yena ndzima 6, kutani hi hlela ku vuya hi ta hlaya na yena leswi engetelekeke hi mhaka leyi.
4. Xana hi yihi minkarhi yin’wana leyi hi nga yi tirhisaka leswaku hi chavelela van’wana?
4 Loko Hi Nga Ri eNsin’wini: Loko ku ri leswaku nkosi wu ta khomeriwa eHolweni ya Mfumo xana ku ta va ni vanhu lava nga riki Timbhoni? Loko swi ri tano va nga ha nyikiwa minkandziyiso leyi nga ta va chavelela. Tindhawu tin’wana to hlayisa vafi kumbe ku va lunghiselela ku hisiwa, ti swi tsakerile ku va ni minkandziyiso leyi nga ta nyikiwa lava feriweke leswaku yi ta va chavelela. Minkarhi yin’wana, maphepha-hungu ma pfumelela vanhu leswaku va tsala marito yo chavelela swirho swa ndyangu leswi feriweke. Siku rin’wana, wanuna un’wana la feriweke ni n’wana wakwe va ye ekaya ra muhuweleri loyi a va tsaleleke rungula ro va chavelela, kutani a fika a ku: “Xana hi wena la ndzi tsaleleke rungula leri? Ndzi lava ku tiva swo tala mayelana ni Bibele!” Wanuna loyi ni n’wana wakwe va pfumerile ku dyondzeriwa Bibele kutani va sungula ku ya eminhlanganweni.
5. Ha yini hi fanele hi xalamukela ku chavelela lava feriweke?
5 Eklesiasta 7:2 yi ri: “Swa antswa ku ya endlwini ya xirilo ku ri ni ku ya endlwini ya nkhuvo.” Munhu la feriweke u tala ku va exiyin’weni lexinene xo yingisela Rito ra Xikwembu ku tlula munhu la tsakeke. Hinkwerhu ka hina hi fanele hi xalamukela ku chavelela lava feriweke hi varhandziwa va vona.