Hi Wisetela Swilo Leswi Simekiweke Swi Tiya
1 Se ku hundze malembe-xidzana yo tala Sathana a ri karhi a hambukisa vanhu vo tala hi ku tirhisa tidyondzo ta mavunwa. U hangalase tidyondzo to tanihi Vunharhu-un’we, moya-xiviri lowu nga fiki ni ndzilo wa tihele. U endla vanhu va kanakana leswaku ku ni Muvumbi ni leswaku mutsari wa Bibele i Xikwembu. Xihlawuhlawu ni ku rhandza tiko hi swin’wana leswi sivelaka vanhu leswaku va nga amukeli ntiyiso. (2 Kor. 4:4) Xana hi nga ti wisetela njhani tidyondzo teto leti simekiweke ti tiya?—2 Kor. 10:4, 5.
2 Ndlela Leyi Munhu A Titwaka Ha Yona: Tidyondzo leti ku nga khale munhu a ti pfumela ti khumba ni ndlela leyi a titwaka ha yona. Van’wana va dyondzisiwe tidyondzo ta mavunwa ku sukela evutsongwanini. Hi fanele hi vulavula na vona hi ndlela leyi kombisaka leswaku ha ma xixima mavonelo ya vona leswaku hi ta kota ku va pfuna.—1 Pet. 3:15.
3 Hi nga kombisa leswaku ha va xixima hi ku va tshika va rhanga va hlamusela leswi va swi pfumelaka ni swivangelo swa kona. (Yak. 1:19) Swi nga ha endleka leswaku va namarhele dyondzo ya moya-xiviri lowu nga fiki hikwalaho ka leswi va feriweke hi munhu loyi va n’wi rhandzaka naswona va navelaka ku tlhela va n’wi vona. Van’wana va tlangela tiholideyi hikwalaho ka leswi va kumaka nkarhi wo tiphina swin’we ni mindyangu ya vona. Ku rhiya ndleve loko va tiphofula swi ta hi pfuna ku twisisa ndlela leyi va titwaka ha yona ni ku hi pfuna leswaku hi vulavurisana na vona hi ndlela leyinene.—Swiv. 16:23.
4 Tekelela Yesu: Yesu u hi vekele xikombiso lexinene ngopfu loko a angula wanuna loyi a a wu tiva kahle Nawu. Yesu a nga n’wi byelanga leswi a a fanele a swi endla hikuva swi nga ha endleka wanuna yoloye a a nga ta swi amukela hikwalaho ka leswi tidyondzo leti a a ti pfumela a ti dzikile embilwini yakwe. Ku ri na sweswo, Yesu u n’wi vutise leswaku Matsalwa ma ri yini, a n’wi kombela leswaku a hlamusela ndlela leyi a ma twisisaka ha yona, kutani a n’wi pfuna ku ma twisisa hi ku n’wi endlela xikombiso.—Luka 10:25-37.
5 Rito ra Xikwembu ri nga swi kota ku endla leswaku vanhu va tshika ku pfumela tidyondzo ta vukhongeri bya mavunwa leti ti dzikeke etimbilwini ta vona. (Hev. 4:12) Loko hi bula ni vanhu hi ntiyiso wa Bibele naswona hi va lehisela mbilu swi ta va pfuna leswaku va tshika tidyondzo ta mavunwa kutani va amukela ntiyiso lowu nga ta va ntshunxa.—Yoh. 8:32.