Papila Leri Humaka eRhavini

Eka Vahuweleri Va Mfumo Lava Rhandzekaka:

Lembe ra ntirho leri nga hundza a ri ri ni ntirho wo tala kambe a ri tsakisa swinene. Hi November 10, 2007, hi tsakele ku nyiketeriwa ka miako ya rhavi swin’we ni magidi ya vamakwerhu va kwala tikweni lava se va nga ni malembe yo tlula 40 va khuvuriwile. A ku te ni vamakwerhu vo tala va le matikweni man’wana. Lexi a ku ri xiendlakalo lexi tsakisaka ni lexi tiyisaka ripfumelo hakunene.

A hi tsakile loko hi fikelela nhlohlorhi leyintshwa ya vahuweleri va 82 447 hi March ni tidyondzo ta Bibele ta 101 498 hi April. Nhlayo ya vanhu vo ringana 205 498 lava a va ri kona exitsundzuxweni, a ku ri ro sungula hi yi fikelela.

Hi n’hweti ya May ku hlaseriwa ka vahlapfa laha tikweni ku hi tseme nhlana. Vamakwerhu vo tala lava humaka ematikweni lawa hi akelaneke na wona va khumbekile swinene. Hambileswi ku nga dlayiwangiki ni un’we wa vona kambe vo tala va vona va onheriwe tindlu ni nhundzu ya vona. Van’wana ku katsa ni vo tala lava a va fambiseriwa dyondzo ya Bibele va hlaseriwile naswona va sale va ri ni gome. Leswi swi nga endliwa hi vamakwerhu lava tshamaka etindhawini leti a ti rhurile swa khutaza hakunene. Vamakwerhu volavo va va nyike ndhawu yo tshama, swakudya, swiambalo ni swilo swin’wana leswi a swi laveka ku pfuna vamakwerhu lava hlaseriweke. Vamakwerhu van’wana va nyikele hi mali leswaku vamakwerhu van’wana va kota ku tlhelela ematikweni ya rikwavo. Le Cape Town vandlha rin’wana ri kume papila leri humaka eka vamakwerhu lava a va tlangela ndlela leyi va pfuniweke ha yona. A ri ku: “A swi nga vonaki leswaku hi vahlapfa, a hi tiphina swin’we na n’wina tanihi ndyangu. Ndlela leyi hi ponisiweke ha yona yi hi kombise ndlela leyi hi nga ta ponisiwa ha yona eArmagedoni kutani hi tshama eparadeyisini yo saseka.” Vo tala va hina hi kume nkarhi wo kombisa leswaku ha va rhandza hakunene vamakwerhu. Loko swi lava leswaku hi va fela hi ta endla tano.—Yoh. 13:34, 35.

Vamakwenu,

Rhavi Ra Afrika Dzonga