“Endla Swilo Hinkwaswo Hikwalaho Ka Mahungu Lamanene”
1. I yini leswi muchumayeri wa Mfumo a tiyimiseleke ku swi endlela vanhu van’wana naswona ha yini?
1 Muapostola Pawulo a a titwa a ri ni vutihlamuleri byo chumayela vanhu van’wana mahungu lamanene. (1 Kor. 9:16, 19, 23) Hilaha ku fanaka, hi endla matshalatshala yo hlawuleka yo chumayela vanhu mahungu lamanene hikwalaho ka leswi hi lavaka leswaku va kuma vutomi lebyi nga heriki.
2. Hi yihi mindzulamiso leyi hi tiyimiseleke ku yi endla loko hi chumayela naswona ha yini?
2 Chumayela Laha Vanhu Va Kumekaka Kona Ni Hi Nkarhi Lowu Va Kumekaka Ha Wona: Muphasi wa tinhlampfi loyi a nga ni ntokoto u hoxa rikoka rakwe laha a tivaka leswaku ku ni tinhlampfi to tala ni hi nkarhi lowu a tivaka leswaku u ta ti phasa. Leswi na hina hi nga “vaphasi va vanhu” hi nga ha boheka ku endla mindzulamiso yin’wana leswaku hi kota ku kuma vanhu ensin’wini ya hina xisweswo hi wu tsakela swinene ntirho wo hlengeleta “tinhlampfi ta mixaka hinkwayo.” (Mat. 4:19; 13:47) Xana hi nga ya hi ya chumayela vanhu emakaya ya vona nimadyambu kumbe hi ya fambisa timagazini exitarateni nimpundzu? Xikongomelo xa Pawulo a ku ri “ku nyikela vumbhoni bya rixaladza hi mahungu lamanene,” naswona a a tirhisa nkarhi wun’wana ni wun’wana lowu faneleke leswaku a endla tano.—Mint. 17:17; 20:20, 24.
3, 4. Loko hi ri ensin’wini, hi nga fambisana njhani ni swiyimo swa vanhu naswona sweswo swi nga va ni vuyelo byihi?
3 Endla Leswaku Swingheniso Swa Wena Swi Fambisana Ni Swilavelo Swa Vanhu: Hakanyingi vaphasi va tinhlampfi va cinca ndlela leyi va ti phasaka ha yona leswaku va phasa tinhlampfi ta muxaka wo karhi. Hi nga ma chumayela njhani mahungu lamanene ya Mfumo hi ndlela leyi nga ta koka rinoko ra vanhu va le nsin’wini ya hina? Hi fanele hi vulavula hi mhaka leyi karhataka vanhu hi ku angarhela naswona hi rhiya ndleve loko va ti phofula. (Yak. 1:19) Hi nga ha va vutisa xivutiso lexi lavaka leswaku va vula mavonelo ya vona hi mhaka yo karhi. (Swiv. 20:5) Hi ndlela yoleyo hi ta kota ku cinca swingheniso swa hina swa mahungu lamanene leswaku swi khumba vutomi bya vona. Pawulo u ve “swilo hinkwaswo eka vanhu va mixaka hinkwayo.” (1 Kor. 9:22) Ku cinca swingheniso swa hina leswaku swi fambisana ni swiyimo i ndlela leyinene yo kota ku fikelela timbilu ta vanhu.
4 Hakunene swa tsakisa ku chumayela vanhu “mahungu lamanene ya leswo antswa”! (Esa. 52:7) Onge hi nga “endla swilo hinkwaswo hikwalaho ka mahungu lamanene” leswaku hi fikelela vanhu vo tala hilaha hi nga kotaka hakona.—1 Kor. 9:23.