Ku Chumayela Vanhu Vo Tala Hilaha Swi Nga Kotekaka Hakona
1. Xana Vakreste vo sungula va endle yini leswaku va kota ku chumayela mahungu lamanene eka vanhu vo tala hilaha swi nga kotekaka hakona?
1 Vadyondzisiwa vo sungula va Yesu a va swi lava hi mbilu hinkwayo ku ya twarisa rungula ra Mfumo hinkwako-nkwako. Va tirhise tindlela leti tirhaka leswaku mahungu lamanene ma ya fika eka vanhu vo tala hilaha swi nga kotekaka hakona. Vatsari va Bibele lava nga Vakreste va tsale matsalwa ya vona lama huhuteriweke hi ririmi ra Xigriki lexi tolovelekeke, ku nga ririmi leri a ri ri ra ximfumo eMfun’wini wa Rhoma. Ku tlula kwalaho, swi nga ha endleka leswaku vachumayeri lava hisekaka va lembe-xidzana ra vumbirhi ni ra vunharhu C.E. ku ya emahlweni, va yi tirhise ngopfu buku ya Matsalwa yo kwetsima, leyi a swi olova ku yi tirhisa ku tlula tsalwa-nsongwa.
2, 3. (a) Xana Esaya 60:16 yi hetiseka njhani manguva lawa? (b) Xana thekinoloji yi tirhisiwa njhani leswaku ku yisiwa vugandzeri bya ntiyiso emahlweni?
2 Ku Tirhisa Thekinoloji: Hi ku tirhisa muprofeta Esaya, Yehovha u profete a ku: “U ta an’wa ntswamba wa matiko.” (Esa. 60:16) Manguva lawa malandza ya Yehovha ma hetisisa vuprofeta lebyi hi ku tirhisa rifuwo ra misava leswaku ma yisa ntirho wo chumayela emahlweni. Hi xikombiso, hi 1914 loko tifilimi ti nga si va bindzu lerikulu, Swichudeni swa Bibele swi sungule ku komba vanhu “Photo-Drama of Creation.” Filimi leyi tlangaka tiawara ta nhungu naswona yi nga ni nkombiso wa tislaydi wa swifaniso swa mivala-vala ni mpfumawulo lowu twalaka kahle, swi tirhisiwe ku twarisa mahungu lamanene eka timiliyoni ta vanhu.
3 Namuntlha, vanhu va Xikwembu va tirhisa michini ya khompyuta leyi gandlisaka hi rivilo lerikulu, va gandlisa Tibibele ni tibuku ta Bibele hi tindzimi ta madzana. Swo famba leswi hatlisaka swi tirhisiwa ku yisa tibuku ta Bibele etindhawini ta le kule, eka vanhu lava nga ematikweni ya 235. Yehovha hi moya wakwe wo kwetsima u susumetele malandza yakwe leswaku ma tirhisa thekinoloji yoleyo hi xitalo, leswaku ntiyiso wa Bibele wu hambeta wu twiwa hi vanhu vo tala swinene ku tlula rini na rini.
4. Hi kwihi ku cinca loku van’wana va ku endleke evuton’wini bya vona leswaku va kota ku chumayela mahungu lamanene eka vanhu vo tala?
4 Ku Cinca Ka Munhu Hi Yexe: Vagandzeri va ntiyiso va cince ndlela leyi va hanyaka ha yona leswaku va kota ku chumayela mahungu lamanene eka vanhu vo tala. Vo tala va tiolovisele vutomi leswaku va ta hlanganyela hi xitalo entirhweni wo chumayela. Van’wana va rhurhele laha ku nga ni ndlala ya vahuweleri va Mfumo leswaku va ya chumayela kona. Van’wana va ndlandlamuxe vutirheli bya vona hi ku dyondza ririmi rimbe.
5, 6. I yini leswi nga endliwaka leswaku ku chumayeriwa vanhu vo tala ensin’wini ya ka hina hilaha swi nga kotekaka hakona?
5 Nakambe, hi nga fikelela vanhu vo tala hi mahungu lamanene hi ku va chumayela hi minkarhi leyi va nga kona emakaya ni kun’wana lomu va kumekaka kona. Hakanyingi loko vanhu va nga kumeki emakaya ninhlikanhi ensin’wini ya ka n’wina, swi nga va njhani mi cinca nkarhi ivi mi va endzela nimadyambu? Xana ti kona tindhawu ta mani na mani leti mi nga chumayelaka eka tona? Xana u tshama u ringeta ku chumayela hi riqingho ni ku chumayela ensin’wini ya mabindzu? Xana u ringeta ku kuma tindlela to chumayela hi xitshuketa?
6 Mawaku lunghelo leri hi nga na rona ro hlanganyela eku twariseni ka vito ra Yehovha ni Mfumo! Onge hi nga hambeta hi hlanganyela eku twariseni ka ntiyiso lowu hanyisaka wa Rito ra Xikwembu eka vanhu vo tala hilaha swi nga kotekaka hakona.—Mat. 28:19, 20.