U Nga Hlamula Njhani?
1. Ha yini hi fanele hi tekelela xikombiso xa Yesu loko hi vutisiwa swivutiso?
1 Ninamuntlha vanhu va ha hlamarisiwa hi ndlela leyi Yesu a a swi hlamula ha yona swivutiso leswi vanhu a va n’wi vutisa swona. Loko na hina hi vutisiwa swivutiso swo hambana-hambana loko hi ri ensin’wini, hi ta va hi endla kahle loko hi tekelela ndlela leyi Yesu a swi hlamula ha yona.—1 Pet. 2:21.
2. I yini lexi nga hi pfunaka leswaku hi nyika munhu nhlamulo leyi enerisaka?
2 Rhanga U Yingisa U Nga Si Hlamula: Yesu a a tivutisa leswaku ha yini munhu a n’wi vutisa xivutiso xo karhi. Minkarhi yin’wana leswi swi nga ha lava leswaku na hina hi vutisa munhu yoloye swivutiso swin’wana ku vona leswi nga emianakanyweni yakwe. Loko munhu a ku vutisa a ku, “Xana wa pfumela eka Yesu?” swi nga ha endleka wa tivutisa leswaku ha yini u nga yi tlangeli Khisimusi. Ku tiva leswi hakunene swi susumetelaka munhu ku vutisa xivutiso xo karhi, swi nga ku pfuna leswaku u n’wi hlamula hi ndlela leyi enerisaka.—Luka 10:25-37.
3. I yini leswi nga ku pfunaka leswaku u hlamula vanhu hi Matsalwa hi ndlela leyi enerisaka?
3 Tirhisa Rito Ra Xikwembu Loko U Hlamula: I swa nkoka ku tirhisa Bibele ya wena loko u hlamula swivutiso. (2 Tim. 3:16, 17; Hev. 4:12) Buku leyi nge Ku Hlamulana ni xihloko lexi nge “Tinhloko-mhaka To Vulavurisana Ta Bibele” lexi nga eka Vuhundzuluxeri Bya Misava Leyintshwa Bya Matsalwa Yo Kwetsima, swi nga ku pfuna ku ba nhloko ya mhaka loko u hlamula swivutiso. Hambiloko munhu loyi a ku vutisaka a nga yi amukeli nhlamulo leyi humaka eBibeleni, hi vutlhari, u nga swi kota ku n’wi tshahela leswi Matsalwa ma swi vulaka. Khutaza munhu la vutisaka leswaku a tikambisisela hi yexe vutlhari lebyi tshembekaka lebyi nga eBibeleni. Loko u tekelela Yesu, tinhlamulo ta wena ti ta fana ni “maapula ya nsuku exibyeni xa silivhere” naswona ti ta aka munhu ti tlhela ti n’wi khutaza.—Swiv. 25:11.
4. Hi le ka swiyimo swihi laha hi nga fanelangiki hi hlamula xivutiso xin’wana ni xin’wana?
4 Xana Hi Fanele Hi Hlamula Xivutiso Xin’wana Ni Xin’wana? Loko u nga yi tivi nhlamulo ya xivutiso xo karhi, u nga chavi ku vula u ku: “A ndzi yi tivi nhlamulo, kambe ndzi ta endla ndzavisiso kutani ndzi ku tela ni nhlamulo.” Ku hlamula hi ndlela ya xichavo ni leyi xiximekaka, swi nga endla leswaku n’wini wa muti a ku kombela leswaku u tlhela u vuya. Loko u swi xiya leswaku xivutiso lexi xi huma eka vakaneti lava xikongomelo xa vona ku nga ku kanetana na wena, tekelela Yesu hi ku nga heti nkarhi wo leha wa ha vulavula na vona. (Luka 20:1-8) Hi hala tlhelo, loko munhu un’wana la nga laviki ku tiva ntiyiso kambe a ngo lava leswaku mi kanetana ntsena a ku vutisa xivutiso, tsema bulo rero hi ndlela leyinene kutani u tirhisa nkarhi wolowo ku lavisisa vanhu va timbilu letinene.—Mat. 7:6.
5. Hi xihi xikombiso lexi Yesu a nga hi vekela xona malunghana ni ku hlamula swivutiso?
5 Yesu a a swi tiva leswaku ku titshega hi Yehovha i swa nkoka leswaku a hetisisa ntirho wakwe wa ku “nyikela vumbhoni malunghana ni ntiyiso,” naswona ntirho wolowo a wu katsa ku hlamula swivutiso swa vanhu lava hakunene va lavaka tinhlamulo. (Yoh. 18:37) Hakunene i lunghelo ku tekelela Yesu loko hi hlamula swivutiso swa vanhu lava nga ni “mboyamelo lowunene eka vutomi lebyi nga heriki”!—Mint. 13:48.