Tirhisa Bibele Hi Vutlhari

1. Ha yini ku tirhisa Bibele swi ri swa nkoka?

¹ Ku tirhisa Rito ra Xikwembu leri huhuteriweke hi vutlhari swi hi pfuna leswaku hi huwelela ni ku dyondzisa ntiyiso hi ndlela leyinene swin’we ni ku paluxa tidyondzo ta mavunwa ni mindhavuko ya vanhu.—2 Tim. 2:15; 1 Pet. 3:15.

2. I yini lexi nga ta hi pfuna leswaku hi kuma matsalwa hi ku olova?

² Tolovelana Ni Bibele: Ku fana niloko u tirhisa xitirhisiwa xin’wana ni xin’wana, u ya u va ni vuswikoti byo xi tirhisa loko u ya u xi tolovela. Ku hlaya Bibele hinkwayo swi nga ku pfuna leswaku u yi twisisa kahle nhloko-mhaka ya Bibele. Swi ta tlhela swi ku pfuna leswaku u tsundzuka matsalwa ni ku ma kuma hi ku olova. Loko u ya u tinyika nkarhi lowu engetelekeke wo dyondza Matsalwa, u ta vulavula hi ku hiseka naswona u ta va ni xivindzi loko u chumayela van’wana hi xitshuketa niloko u ri ensin’wini.—1 Tes. 1:5.

3, 4. (a) Hi tihi tindlela tin’wana leti hi nga ti tirhisaka leswaku hi tolovela Bibele? (b) Xana ti kona tindlela leti u nga tshama u ti tirhisa leswaku u titoloveta Matsalwa?

³ Swi endle mukhuva ku pfula Bibele ya wena loko u ri eminhlanganweni ya vandlha naswona u fambisana ni muhlayi. Loko u tiendlela dyondzo ya wena n’wini kumbe u ri eku lunghiseleleni ka minhlangano ya vandlha, kambisisa Matsalwa lama kombisiweke naswona u anakanyisisa hi ndlela leyi u nga ma tirhisaka ha yona. Vanhu vo tala va vula leswaku swa pfuna ku hlaya tindzimana ta Bibele hi ku kongoma eBibeleni ematshan’weni yo ti hlaya eka khompyuta kumbe ephepheni, naswona leswi swa va pfuna leswaku va ti tsundzuka loko va lava ku ti tirhisa ensin’wini.—Yoh. 14:26.

⁴ Mindyangu yin’wana yi tinyika nkarhi wa ku nhlokohata tindzimana ta Bibele. Leswi yi swi endla hi ku tirhisa makhadi lama nga tsariwa marito lama humaka eBibeleni kumbe ndzimana hi yoxe. Yi tirhisa makhadi wolawo yi ri karhi yi cincana ku vona loko yi ta swi kota ku tshaha ndzimana yoleyo kumbe ku tsundzuka laha yi kumekaka kona eBibeleni. Ku titoloveta swingheniso swa le nsin’wini swin’we ni ndlela yo hlamula lava ringetaka ku siva bulo kumbe ku hlamula swivutiso hi ku tirhisa Bibele, swi nga hi pfuna leswaku hi tolovela Bibele.

5. Ha yini hi lava ku antswisa vuswikoti bya hina malunghana ni ku tirhisa Bibele?

⁵ A ku na buku leyi fanaka ni Bibele. Hi yona ntsena leyi nga ni marito lama nga ‘tlharihisaka vanhu leswaku va ta pona.’ (2 Tim. 3:15) Leswi vanhu vo tala ensin’wini ya hina va nga ri tolovelangiki rungula ra risima leri nga eBibeleni, hi ni xivangelo lexi twalaka xa ku antswisa vuswikoti bya hina byo va pfuna leswaku va tiva leswi nga eBibeleni.—Swiv. 2:1-5.