Tamela Rito Ra Ntiyiso Hi Vutshila

1 Vutshila bya hina eku tirhiseni ka Rito ra Xikwembu byi nga khumba ndlela leyi vanhu va amukelaka mahungu lamanene ha yona. Hi xikombiso, Pawulo u khutaze ku engetela vuswikoti evutirhelini, a ku: “Endla hi matimba ku vonaka u ri la nkhensekaka emahlweni ka Xikwembu, u nga ri na tingana hi ntirho wa wena, u dyondzisa Rito ra ntiyiso hi ndlela leyinene.”—2 Tim. 2:15.

2 Vutshila eku tirhiseni ka Bibele byi fanele byi kurisiwa. Ku vekela nkarhi etlhelo wa dyondzo ya munhu hi xiyexe ni ku va kona eminhlanganweni ya Vukriste i swa nkoka. Hambi swi ri tano, hi fanele hi tirhisa swilo leswi hi swi dyondzaka hi ku tirhisa Bibele nkarhi na nkarhi evutirhelini. Leswi swi lava matshalatshala ya nkarhi na nkarhi loko hi lava mpfuno ni nkongomiso wa Xikwembu.—1 Yoh. 3:22.

3 Yisa Nyingiso Eka Rito Ra Xikwembu: I swa nkoka leswaku vanhu va swi xiya leswaku rungula ra hina a ri sunguriwanga hi hina vini, kambe ri huma eka Rito ra Xikwembu leri tsariweke. (Yoh. 7:18) Ku komba munhu leswi Xikwembu xi swi vulaka hi mhaka eBibeleni swi nga va ni nkucetelo lowukulu. Vanhu va timbilu to lulama va kokeriwa eka rungula ra matimba ra Bibele. Loko hi tirhisa Matsalwa swinene, hi va ni vuswikoti lebyikulu naswona hi ta swi kota ku nyika van’wana tinhlamuselo leti taleke ta Rito ra Xikwembu, leti ti nga ta va pfuna.

4 Vanhu vo tala a va yi tolovelanga Bibele. Loko hi yi tirhisa, hi fanele hi endla leswi engetelekeke ku tlula ku hlaya tindzimana ntsena. Ku lunghiselela loku anakanyisisiwaka ka laveka leswaku hi tiva ndlela yo nghenisa tsalwa. Swivutiso kumbe xiphiqo lexi vuriwaka xi nga ha tirhiseriwa ku pfuxa ku tsakela. Nakambe, hi fanele hi nyikela nyingiso eka leswi hi swi vulaka loko tsalwa ri hlayiwa. Munhu a nga ha tsandzeka ku twisisa yinhla hi ku hlaya kan’we ntsena. Ku kandziyisa swinene marito-nkulu ni ku ma tirhisa swi ta endla leswaku mianakanyo yi dzika.—Vona School Guidebook, tidyondzo 24 na 25.

5 Nyiko: Hi November hi ta va hi nyikela Bibele—I Rito Ra Xikwembu Kumbe I Ra Munhu? Hi nga va tshinelela njhani vanhu hi nyiko leyi? Endzhaku ko titivisa hi nga ha ku: “Namuntlha, vanhu vo tala va tshemba vanhu kumbe tibuku to hambana-hambana leswaku va kuma nkongomiso. U anakanya leswaku hi xihi xihlovo lexinene xa nkongomiso lowu tirhaka? [Yimela nhlamulo.] Xiya leswi Bibele yi swi vulaka hi xihlovo xa ntiyiso xa vutlhari. [Hlaya Swivuriso 2:6, 7.] Vutlhari bya munhu byi tikombe byi kayivela hi ndlela leyi khomisaka gome, byi vanga ku xaniseka ni ku hela matimba. Kambe, vutlhari bya Xikwembu nkarhi hinkwawo byi tikomba byi tshembeka ni ku pfuna. [Hlaya Esaya 48:17, 18.] Hikwalaho, hi fanele hi languta eka Xikwembu lexi nyikaka nkongomiso lowu lavekaka leswaku hi hlangavetana ni swiphiqo leswi hi langutanaka na swona.” Kutani hi nga pfula eka ndzima 12 ebukwini leyi nge Rito Ra Xikwembu ivi hi yisa nyingiso eka ndzimana 2. Endzhaku ka sweswo, yinhla leyi faneleke leyi humaka eka ndzima leyi yi nga nghenisiwa.

6 Endzhaku ko tirhisa Swivuriso 2:6, 7 leswaku u kandziyisa vukulukumba bya vutlhari bya Xikwembu, hlamusela n’wini wa muti mhaka leyi u swi koteke ku xixima ni ku tlangela Bibele ha yona. N’wi tivise leswaku tidyondzo ta yona ti ta n’wi pfuna ni ku n’wi nyika ntshembo lowu tiyeke wa nkarhi lowu taka. Bulo ro tano ri nga ha pfula minkarhi yo kombisa switsundzuxo swin’wana swa vutlhari swa Bibele eka swiphiqo swa siku na siku naswona ri nga ha yisa eka dyondzo ya Bibele.

7 Yesu nkarhi hinkwawo u kombetele eMatsalweni leswaku a pfuna vanhu va timbilu letinene ni ku landzula vakaneti vakwe. Pawulo a a swi toloverile ku ‘hlamusela ni ku kombisa hi matsalwa’ swilo leswi a swi dyondzeke. (Mintirho 17:2, 3) Ntshembo ni ntsako wa hina evutirhelini swi ta andza loko hi ku hiseka hi lwela ku va ni vutshila lebyi engetelekeke swinene eku tameleni ka Rito ra ntiyiso.