Ri Tamele Khwatsi Rito Ra Xikwembu
1 Loko a ri karhi a chumayela mutirhela-mfumo, ‘Filipi u pfule nomu kutani a sungula hi Tsalwa ro karhi, a n’wi byela mahungu lamanene malunghana na Yesu.’ (Mint. 8:35) Filipi a a ri “tamela khwatsi rito ra ntiyiso.” (2 Tim. 2:15) Hambiswiritano, valanguteri lava famba-fambaka va xiye leswaku manguva lawa, vahuweleri vo tala va tirhisa Bibele hi xiwelo loko va ri eku chumayeleni. Xana wa yi tirhisa Bibele loko u ri evutirhelini?
2 Swilo hinkwaswo leswi hi swi kholwaka ni leswi hi swi dyondzisaka swi huma eRitweni ra Xikwembu. (2 Tim. 3:16, 17) Hi rona ri kokelaka vanhu eka Yehovha ni ku va dyondzisa ndlela leyi va faneleke va hanya hi yona. Hi yona mhaka leyi swi nga swa nkoka ku tirhisa Bibele evutirhelini bya hina ku ri ni ku bula hi timhaka leti rhandziwaka hi hina. (Hev. 4:12) Leswi vanhu vo tala va nga riki na vutivi byo nyawula bya Bibele, hi fanele ku yi hlaya hi ku kongoma leswaku hi va komba nkongomiso wa yona lowu pfunaka ni vumundzuku lebyi yi byi tshembisaka vanhu.
3 Hlaya Bibele Hi Ku Kongoma: Ringeta ku ya eku chumayeleni u nga khomanga nkwama. Minkandziyiso leyi u nga ta yi fambisa u nga ha yi hoxa enkwameni lowutsongo,ivi u khoma Bibele hi voko kumbe u yi hoxa exikhwameni xa baji. Kutani, loko u pfuxa bulo ni munhu wo karhi, swi ta olova ku humesa Bibele a nga si swi xiya leswaku u le ku n’wi chumayeleni. Yima hi ndlela leyi nga ta endla leswaku muyingiseri wa wena a kota ku hlaya Bibele swin’we na wena. Loko swi koteka n’wi kombele ku hlayela ndzimana yoleyo ehenhla. Leswi u n’wi byelaka swona swi va ni ntikelo swinene loko a tivonela hi ya yena leswi Bibele yi swi vulaka ku ri ni ku swi twa swi huma eka wena. Hambiswiritano, ku n’wi pfuna leswaku a twisisa yinhla ya ndzimana yoleyo, kandziyisa marito lama tameleke mongo wa mhaka.
4 Xingheniso Xa Tsalwa Rin’we: Endzhaku ka loko mi pfuxelanile, u nga ha ku: “Etindhawini to hambana-hambana vanhu va lava lexi nga va kongomisaka evuton’wini. Xana u vona leswaku wu nga kumeka kwihi nkongomiso wo antswa ni lowu pfunaka? [Yimela nhlamulo.] U anakanya yini hi marito lawa? [Hlaya Swivuriso 2:6, 7 kutani u yimela nhlamulo.] Vutlhari bya vanhu byi tsandzeke hi ndlela leyi khomisaka tingana naswona byi khomise vanhu vo tala gome. Kambe, vutlhari bya Xikwembu bya tshembeka minkarhi hinkwayo naswona bya vuyerisa.” Kutani n’wi kombe nkandziyiso lowu u wu tameleke ivi eka wona u kandziyisa xikombiso xin’we xa vutlhari bya Xikwembu lebyi pfunaka.
5 Yesu u tirhise Matsalwa ku pfuna vanhu va timbilu to tshembeka. (Luka 24:32) Pawulo u swi seketele hi Matsalwa leswi a a swi dyondzisa. (Mint. 17:2, 3) Loko hi hambeta hi lota vutshila bya hina bya ku ri tamela khwatsi Rito ra Xikwembu, xivindzi xa hina ni ntsako evutirhelini swi ta ya swi kula.