Xana U Dyondzisa Rito Ra Xikwembu Hi Ndlela Leyinene?
1 Yesu Kreste a a ri mudyondzisi lonkulu swinene la tshameke a hanya emisaveni. U vulavule hi ndlela leyi khumbeke timbilu ta vanhu, u pfuxe mintlhaveko ya vona naswona u va khutaze ku titoloveta ku endla mintirho leyinene. (Mt. 7:28, 29) Nkarhi hinkwawo u tirhise Rito ra Xikwembu tanihi xisekelo xa dyondzo ya yena. (Lk. 24:44, 45) U dzunise Yehovha Xikwembu eka hinkwaswo leswi a swi tiva nileswi a koteke ku swi dyondzisa. (Yoh. 7:16) Yesu u vekele valandzeri va yena xikombiso lexinene hi ku dyondzisa Rito ra Xikwembu hi ndlela leyinene.—2 Tim. 2:15.
2 Muapostola Pawulo u tlhele a tirha tanihi xikombiso lexinene hi ku dyondzisa Rito ra Xikwembu hi ndlela leyi humelelaka. A nga hlayelanga vanhu Matsalwa ntsena; u ma hlamuserile a tlhela a anakanyisisa hi leswi a a swi hlaya, a nyikela xitiyisekiso hi Rito ra Xikwembu xa leswaku Yesu a a ri Kreste. (Mint. 17:2-4) Hi ku fanana, mudyondzisiwa Apolosi loyi a ri xivulavuri xa matimba a a “[tiva] ngopfu Matsalwa,” naswona u ma dyondzise hi ndlela leyinene loko a hlamusela ntiyiso hi ndlela ya matimba.—Mint. 18:24, 28.
3 Vana Mudyondzisi Wa Rito Ra Xikwembu: Vahuweleri va Mfumo va manguva lawa va humelerile swinene eku dyondziseni ka vanhu va timbilu letinene hi ku va kombisa eBibeleni ni ku hlamulana na vona hi yona. Emhakeni yin’wana, makwerhu un’wana wa xinuna u kote ku tirhisa Ezekiyele 18:4 kun’we ni matsalwa man’wana lama fambelanaka na yona leswaku a hlamulana ni mufundhisi ni vanhu vanharhu lava nghenaka kereke ya muganga wa yena mayelana ni ku kunguhateriwa ka lavo lulama ni lavo homboloka. Hikwalaho ka sweswo, swirho swin’wana swa kereke swi sungule ku dyondza, naswona eku heteleleni un’wana wa vona u amukele ntiyiso. Emhakeni yin’wana, makwerhu wa xisati u komberiwe ku hlamusela nuna la kanetaka wa munhu la tsakelaka lexi endlaka Timbhoni ta Yehovha ti nga yi tlangeli Khisimusi ni masiku ya ku velekiwa. Loko a ri karhi a hlaya tinhlamulo ta Matsalwa hi ku kongoma ebukwini leyi nge Ku Hlamulana, wanuna loyi u phofule ku pfumelelana ka yena ni mhaka leyi. Nsati wakwe u tsakisiwe hi ku twisisa ka yena lerova a ku: “Hi ta ta eminhlanganweni ya n’wina.” Naswona nuna wakwe u pfumerile!
4 Tirhisa Mpfuno Lowu Kumekaka: Vutirheli Bya Hina Bya Mfumo ni nongonoko wa Nhlangano wa Ntirho swi nyikela nkongomiso lowunene lowu hi pfunaka eku dyondziseni ka Rito ra Xikwembu. Vahuweleri vo tala va phofule ku tlangela ka vona swingheniso swo hambana-hambana leswi ringanyetiweke leswi humesiweke ni ku kombisiwa nileswi swi tikombeke swi ri enkarhini leswaku swi hi pfuna naswona swa humelela. Buku leyi nge Ku Hlamulana Hi Matsalwa yi ni tidyondzo to tala ta malunghana ni ndlela yo hlamusela tinhloko-mhaka-nkulu to tlula 70 hi ndlela leyinene leti hlamuseriwaka eRitweni ra Xikwembu. Buku leyi nge Vutivi Lebyi Yisaka eVuton’wini Lebyi Nga Heriki yi nyikela nkatsakanyo wa tidyondzo ta nkoka ta Bibele leti vanhu lavantshwa va faneleke va ti twisisa. Tidyondzo 24 na 25 ta Buku Yo Letela Ya Xikolo Xa Vutirheli Bya Le Tilweni ti hi kombisa ndlela leyi vadyondzisi lava nga ni vutshila va boxaka matsalwa, va ma hlaya ni ku ma tirhisa hi ndlela leyinene. Hi fanele hi wu tirhisa kahle mpfuno hinkwawo lowu hi wu kumaka hi ku olova.
5 Loko hi dyondzisa Rito ra Xikwembu hi ndlela leyinene, hi ta kuma leswaku “ra hanya, naswona ra tirha . . . ri kota ku hlaya mianakanyo ni makungu ya mbilu” eka lava hi va chumayelaka. (Hev. 4:12) Ntsako lowu hi wu kumaka loko hi humelela eku ri tirhiseni wu ta hi susumetela ku vulavula ntiyiso hi tiyile swinene!—Mint. 4:31.