“Mi Pfurha Hi Moya”
1. Hi yihi mfanelo leyi hi faneleke hi va na yona entirhweni wa hina wo chumayela?
1 Ntirho wa hina wa Vukreste a wu fanelanga wu va ndzhwalo. Hi hala tlhelo, hi khutaziwa leswaku ‘hi pfurha hi moya naswona hi va mahlonga ya Yehovha.’ (Rhom. 12:11) Hambiswiritano, ku ni swilo swo tala leswi nga endlaka leswaku hi nga ha byi hisekeli vutirheli bya hina. Hi nga ku ‘kondletela njhani ku wu hisekela ka hina ntirho wa Mfumo, ku fana ni ndzilo?’—2 Tim. 1:6, 7.
2. Ntirho wo chumayela wu fambisana njhani ni ku va ni dyondzo ya Bibele ya munhu hi yexe?
2 Dyondzo Ya Bibele Ya Munhu Hi Yexe: Muchumayeri wa Mfumo la hisekaka u rhandzaka nawu wa Xikwembu naswona tidyondzo leti a ti kumaka eka wona, ta n’wi khumba swinene. (Ps. 119:97) Ku hlaya Bibele edyondzweni ya munhu hi yexe swi nga khumba timbilu ta hina naswona swi hi pfuna leswaku hi hiseka swinene. Leswi hi rhandzaka Munyiki wa tidyondzo leti hi ti kumaka naswona hi navelaka ku byela van’wana mahungu lamanene, sweswo swi hi susumetela ku dzunisa Xikwembu ni ku twarisa vito ra xona erivaleni. (Hev. 13:15) Ku chumayela mahungu lamanene hi ku hiseka swi kombisa ndlela leyi hi wu tlangelaka ha yona nkoka wa mahungu wolawo.
3. Moya wa Xikwembu wu tlanga xiphemu xihi entirhweni wa hina wo chumayela?
3 Khongelela Moya Wa Xikwembu: Leswaku ntirho wo chumayela wu va ni vuyelo lebyinene a swi titsheganga hi matimba ya hina. Kambe swi titshege hi moya wa Xikwembu. (1 Pet. 4:11) Ku tshinela ekusuhi ni Xihlovo xa “matimba lamakulu” swi ta hi nyika matimba yo chumayela hi xivindzi. (Esa. 40:26, 29-31) Loko Muapostola Pawulo a langutane ni maxangu evutirhelini byakwe, u ‘kume mpfuno lowu humaka eka Xikwembu.’ (Mint. 26:21, 22) Moya lowo kwetsima wa Yehovha wu nga hi pfuna leswaku hi pfurha evutirhelini bya hina, kutani hi fanele hi wu khongelela.—Luka 11:9-13.
4. Ku hiseka swi nga va ni vuyelo byihi, naswona i yini leswi hi faneleke hi swi tsundzuka?
4 Minkarhi yo tala ku hisekela ku chumayela hi Mfumo swi endla leswaku ni Vakreste-kulorhi va swi hisekela. (2 Kor. 9:2) Loko hi ri ensin’wini vanhu va ta ri amukela rungula ra hina loko hi ri hisekela naswona hi vulavula hi ndlela leyi khorwisaka. Kambe sweswo hi fanele hi swi endla hi vuxiyaxiya, naswona hi ri lava rhuleke. (Tito 3:2) Minkarhi hinkwayo, hi xixima n’wini wa muti swin’we ni ntshunxeko wakwe wo tihlawulela.
5. Hi xihi xikhutazo lexi huhuteriweke lexi hi faneleke hi xi tekela enhlokweni?
5 Tanihi vachumayeri va Mfumo, onge minkarhi hinkwayo hi nga “pfurha hi moya.” A hi hambeteni hi hisekela dyondzo ya Bibele ya munhu hi yexe ni ku khongela eka Yehovha swi huma embilwini hikuva hi yena loyi a nga ta hi nyika moya wakwe wo kwetsima lowu nga ni matimba. Hi ndlela yoleyo, hi ta ya emahlweni hi hisekela vutirheli bya hina hi “moya lowo kwetsima ni ku khorwiseka lokukulu.”—1 Tes. 1:5.