Xana U Ta Tekelela Ku Hiseka Ka Yehovha Na Yesu Hi Nkarhi Lowu Wa Xitsundzuxo?

1. Hi wahi matshalatshala lamakulu lawa Timbhoni ta Yehovha ti ma endlaka hi nkarhi wa Xitsundzuxo?

¹ Yehovha u hetisisa xikongomelo xakwe hi ku hiseka. Loko Esaya 9:7 yi vulavula hi mikateko yin’wana leyi nga ta tisiwa hi Mfumo wa Xikwembu yi ri: “Ku hiseka ka Yehovha wa mavuthu ku ta swi endla.” Hilaha ku fanaka, N’wana wa Xikwembu u kombise leswaku u byi hisekela swinene vugandzeri bya ntiyiso hi nkarhi wa vutirheli byakwe bya laha misaveni. (Yoh. 2:13-17; 4:34) Lembe ni lembe hi nkarhi wa Xitsundzuxo, vahuweleri va timiliyoni emisaveni hinkwayo va endla matshalatshala lamakulu leswaku va tekelela ku hiseka ka Yehovha na Yesu hi ku tirha tiawara leti engetelekeke entirhweni wa nsimu. Xana na wena u ta tirha tiawara leti engetelekeke?

2. Ku hiseka ku ta hi susumetela leswaku hi endla yini ku sukela hi March 7?

² Tsima Ro Rhambela Vanhu eXitsundzuxweni: Lembe leri, tsima ro rhambela vanhu eXitsundzuxweni ri ta sungula hi Mugqivela, March 7. Kunguhata ka ha ri sweswi leswaku u ta tirha nsimu hi ku hiseka. Mavandlha ma ta va ma tsake swinene loko ma ri karhi ma tikarhata hilaha ma nga kotaka hakona ku hlanganisa nsimu ya wona leyikulu. Tikarhatele ku rhamba swichudeni swa wena swa Bibele, maendzo ya wena yo vuyela, vatirhikuloni, maxaka ya wena ni vadyondzikuloni hi ku va nyika xirhambo kumbe hi ku tirhisa jw.org.

3. Hi nga tirha tiawara leti engetelekeke ensin’wini hi March na April hi ndlela yihi?

³ Teka Vuphayona Bya Nkarhinyana: Ku hiseka ku ta tlhela ku hi susumetela ku tirha tiawara leti engetelekeke ensin’wini. A swi kanakanisi leswaku vo tala va ta kota ku teka vuphayona bya nkarhinyana hi March na April, tanihi leswi hi nga tihlawulelaka loko hi lava ku tirha 30 wa tiawara. Hi nkarhi wa vugandzeri bya n’wina bya ndyangu kumbe hi nkarhi wa dyondzo ya wena ya munhu hi yexe, khongela hi ndlela leyi u nga swi endlaka ha yona sweswo. (Swiv. 15:22) Ku hisekela ka wena tsima leri ku nga ha khutaza van’wana leswaku na vona va hiseka. Loko u endla ku cinca ko karhi leswaku u tirha nkarhi lowu engetelekeke, u ta va u tekelela ku hiseka ka Yesu.—Mar. 6:31-34.

4. I yini leswi hi nga ta vuyeriwa ha swona loko hi tekelela ku hiseka ka Yehovha na Yesu?

⁴ Loko hi tekelela ku hiseka ka Yehovha na Yesu hi nkarhi lowu wa Xitsundzuxo swi ta hi tisela mikateko yo tala. Vanhu vo tala va le nsin’wini va ta chumayeriwa. Hi ta kuma ntsako ni ku eneriseka leswi tisiwaka hi ku tirhela Yehovha ni ku nyika van’wana. (Mint. 20:35) Xa nkoka swinene, hi ta tsakisa Xikwembu xa hina lexi hisekaka ni N’wana wa xona.