Hi Fanele Hi Tshama Hi Ri Karhi Hi Hisekela Ntirho Wo Chumayela
1 Ku sukela hi 1992, Timbhoni ta Yehovha ti hete tiawara to tlula biliyoni ti ri karhi ti hisekela ku endla ntirho wo chumayela ni ku endla vadyondzisiwa. Ha tsaka leswi hi hoxeke xandla entirhweni lowu wo hlamarisa!—Mat. 28:19, 20.
2 Hi fanele hi nkhensa Yehovha hi tlhela hi n’wi dzunisa hikuva wa hi hlayisa leswaku hi kota ku chumayela ‘eminkarhini leyi ya mangava.’ (2 Tim. 3:1) Xana hi fanele hi endla yini leswaku hi ta ya emahlweni hi hisekela ntirho lowu wa nkoka?
3 Lexi Endlaka Hi Hiseka: Lexi endlaka leswaku hi hisekela ntirho wa hina wo chumayela hi Mfumo i ku rhandza Xikwembu ni muakelani hi mbilu hinkwayo, swin’we ni ku tiyimisela ku hanya hi ku pfumelelana ni ku tinyiketela ka hina, swi huma embilwini. (Mat. 22:37-39; 1 Yoh. 5:3) Rirhandzu ri endla leswaku hi titsona swo karhi leswaku hi ta hlanganyela hi xitalo entirhweni wo chumayela.—Luka 9:23.
4 Tshama U Ri Karhi U Hiseka: Nala wa hina Diyavulosi u endla hinkwaswo leswi a nga swi kotaka leswaku a hi tshikisa ntirho wo chumayela. Swin’wana swa swilo leswi a swi tirhisaka i ku kanetiwa hi vanhu loko hi ri ensin’wini, swiyimo swa misava leswi hi kavanyetaka, mintshikilelo ya siku ni siku ni ku vilerisiwa hi mavabyi lama hi hlaselaka.
5 Hikwalaho hi fanele hi tirha hi matimba leswaku hi tshama hi ri karhi hi hiseka. I swa nkoka leswaku hi hlakulela ‘rirhandzu leri a hi ri na rona eku sunguleni.’ Sweswo swi katsa ku hlaya ni ku anakanyisisa hi Rito ra Xikwembu, ku nga Bibele, ni ku tirhisa malunghiselelo hinkwawo lawa “hlonga ro tshembeka ni ro tlhariha” ri hi pfunaka ha wona leswaku hi tshama hi tiyile eripfumelweni.—Nhlav. 2:4; Mat. 24:45; Ps. 119:97.
6 Tanihi laha vuprofeta bya Bibele byi swi vekaka erivaleni hakona, siku ra Yehovha leri ha rona a nga ta lovisa vanhu lava nga n’wi chaviki ri tshinela hi ku hatlisa. (2 Pet. 2:3; 3:10) Leswi hi swi vonaka leswaku siku rero ri tshinele, a hi tirheni hi matimba leswaku hi tshama hi ri karhi hi hiseka, hi hlanganyela hi xitalo entirhweni lowu nga le ku endliweni sweswi wa ku chumayela hi Mfumo ni ku endla vanhu vadyondzisiwa!