Xana Se U Ri Tatile Khadi Ra Wena Ra Ngati?

I swa nkoka swinene ku tata khadi ra wena ra DPA (durable power of attorney) leri nga lunghiseleriwa Timbhoni leti khuvuriweke. Leswi ‘u nga swi tiviki leswaku vutomi bya wena byi ta va yini mundzuku,’ i swa nkoka ku hlawula ka ha ri ni nkarhi u tlhela u swi tsala ehansi leswi u nga swi hlawula malunghana ni ndlela leyi u nga ta tsakela ku tshunguriwa ha yona ehansi ka swiyimo leswi nga languteriwangiki. (Yak. 4:14; Mint. 15:28, 29) Leswaku u endla xiboho lexinene, ku humesiwe vhidiyo leyi nge Transfusion-Alternative Health Care—Meeting Patient Needs and Rights. Yi hlalele kutani u kombela nkongomiso wa Yehovha hi xikhongelo loko u ri karhi u pfuxeta leswi u swi dyondzeke hi ku tirhisa swivutiso leswi xaxametiweke laha hansi.—Xiya: Tanihi leswi vhidiyo leyi yi pfaka yi kombisa ndlela leyi vuhandzuri byi endliwaka ha yona, vatswari va fanele va va ni vuxiya-xiya loko va yi hlalela ni vana.

(1) Ha yini madokodela man’wana ma tlhela ma kambisisa mhaka ya ku pompela vanhu ngati? (2) Nyika swikombiso swinharhu swa vuhandzuri lebyi rharhanganeke lebyi endliwaka handle ko pomperiwa ngati. (3) I mangani madokodela emisaveni hinkwayo lama kombiseke leswaku ma tiyimiserile ku tshungula vavabyi handle ko va pompela ngati? Hikwalaho ka yini ma tiyimisela ku endla tano? (4) Xana nkambisiso wa sweswinyana lowu endliweke eswibedlhele wu kombisa yini malunghana ni mhaka ya ku tirhisa ngati? (5) Hi wahi makhombo lama fambisanaka ni ku pomperiwa ngati? (6) Xana vativi vo tala va ri yini malunghana ni vuyelo bya ku tirhisa matshungulelo man’wana handle ka ngati? (7) I yini leswi endlaka munhu a kayivela ngati? Hi wihi mpimo wa ngati lowu vanhu va nga swi kotaka ku hanya ha wona? Xana ku nga endliwa yini leswaku yi engeteleka? (8) Xana tisele to tshwuka ti nga engeteriwa njhani emirini wa muvabyi? (9) Hi tihi tindlela leti tirhisiwaka leswaku ku hungutiwa ku lahlekeriwa hi ngati hi nkarhi wa vuhandzuri? (10) Xana matshungulelo man’wana handle ka ngati ma nga tirhisiwa eka vana ni le ka vanhu lava langutaneke ni swiyimo leswi xungetaka vutomi? (11) Hi wihi nchumu wa nkoka lowu nga enawini, lowu faneleke wu tsundzukiwa loko ku tiwa emhakeni yo tshungula muvabyi? (12) Ha yini swi ri swa nkoka eka Vakreste ku hlawula matshungulelo lama nga tirhisiki ngati ka ha ri emahlweni? Xana leswi hi nga swi endla njhani?

Ku amukela byin’wana bya vutshunguri lebyi kombisiweke eka DVD leyi i xiboho lexi endliwaka hi munhu hi yexe, hi ku yingisa ripfalo rakwe leri leteriweke hi Bibele. Xana se u xi endlile xiboho xa leswaku hi tihi tindlela to tshungula handle ko tirhisa ngati leti wena ni vana va wena mi nga ta ti amukela ni ku titsala emakhadini ya n’wina ya DPA? Leswaku u kuma rungula leri engetelekeke hi mhaka leyi, kambisisa ndzima 7 ya buku leyi nge ‘Rirhandzu Ra Xikwembu’ swin’we ni swikombo leswi kombisiweke eka yona. Nakambe vona xiengetelo lexi nge, “Xana Ndzi Fanele Ndzi Tshunguriwa Hi Ngati Ya Mina Ni Hi Swiphemu Swa Yona Leswitsongo?” lexi nga eka Vutirheli Bya Hina Bya Mfumo bya January 2007. Xo hetelela, tiyiseka leswaku leswi u swi hlawuleke u swi tsala eka khadi ra wena ra DPA. Lava u va hlawuleke leswaku va va vayimeri va wena swin’we ni swirho swa ndyangu leswi nga riki Timbhoni, va fanele va swi tiva kahle swiboho swa wena.

[Bokisi leri nga eka tluka 7]

• Xana se u ti hlawurile tindlela ta vutshunguri leti wena ni vana va wena mi nga ta ti amukela?

• Xana khadi ra wena ra DPA leri tatiweke kahle u tshama u ri na rona leswaku ri ku pfuna loko ko tshuka ku laveka mpfuno wa xihatla?