Xana Se U Ri Tatile Khadi Ra Wena Ra DPA?

Timbhoni leti khuvuriweke ti fanele ti tata khadi ra DPA (durable power of attorney). Tanihi leswi u nga swi ‘tiviki leswaku ku ta endleka yini ha wena mundzuku,’ i swa nkoka leswaku u hlawula ndlela leyi u lavaka ku tshunguriwa ha yona ka ha ri ni nkarhi naswona u tsala ehansi. (Yak. 4:14; Mint. 15:28, 29) Leswaku u kota ku endla xiboho lexinene, ku humesiwe DVD leyi nge Transfusion-Alternative Health Care—Meeting Patient Needs and Rights. Yi hlalele kutani u kombela nkongomiso wa Yehovha loko u ri karhi u anakanyisisa hi leswi u swi dyondzeke, u tirhisa swivutiso leswi xaxametiweke laha hansi.—Xiya: Tanihi leswi DVD leyi yi pfaka yi kombisa ndlela leyi vuhandzuri byi endliwaka ha yona, vatswari va fanele va va ni vuxiyaxiya loko va languta DVD leyi ni vana.

(1) Ha yini madokodela man’wana ma tlhela ma kambisisa mhaka ya ku pompela vanhu ngati? (2) Nyika swikombiso swinharhu swa vuhandzuri lebyi rharhanganeke lebyi endliwaka handle ko pomperiwa ngati. (3) I mangani madokodela emisaveni hinkwayo lama kombiseke leswaku ma tiyimiserile ku tshungula vavabyi handle ko va pompela ngati? Hikwalaho ka yini ma tiyimisela ku endla tano? (4) Xana nkambisiso wa sweswinyana lowu endliweke eswibedlhele wu kombisa yini malunghana ni mhaka ya ku tirhisa ngati? (5) Hi wahi makhombo lama fambisanaka ni ku pomperiwa ngati? (6) Xana vativi vo tala va ri yini malunghana ni vuyelo bya ku tirhisa matshungulelo man’wana handle ka ngati? (7) I yini leswi endlaka munhu a kayivela ngati? Hi wihi mpimo wa ngati lowu vanhu va nga swi kotaka ku hanya ha wona? Xana ku nga endliwa yini leswaku yi engeteleka? (8) Xana tisele to tshwuka ti nga engeteriwa njhani emirini wa muvabyi? (9) Hi tihi tindlela leti tirhisiwaka leswaku ku hungutiwa ku lahlekeriwa hi ngati hi nkarhi wa vuhandzuri? (10) Xana matshungulelo man’wana handle ka ngati ma nga tirhisiwa eka vana ni le ka vanhu lava langutaneke ni swiyimo leswi xungetaka vutomi? (11) Hi wihi nchumu wa nkoka lowu nga enawini, lowu faneleke wu tsundzukiwa loko ku tiwa emhakeni yo tshungula muvabyi? (12) Ha yini swi ri swa nkoka eka Vakreste ku hlawula matshungulelo lama nga tirhisiki ngati ka ha ri emahlweni? Xana leswi hi nga swi endla njhani?

Ku amukela byin’wana bya vutshunguri lebyi kombisiweke eka DVD leyi i xiboho lexi endliwaka hi munhu a ri yexe, hi ku yingisa ripfalo rakwe leri leteriweke hi Bibele. Xana se u xi endlile xiboho xa leswaku hi tihi tindlela to tshungula handle ko tirhisa ngati leti wena ni vana va wena mi nga ta ti amukela? Leswaku u kuma rungula leri engetelekeke hi mhaka leyi, vona “Bokisi Ra Swivutiso” ra Xihondzo xo Rindza xa June 15, 2004 ni xa October 15, 2000, ni xiengetelo lexi nge “Xana Ndzi Fanele Ndzi Tshunguriwa Hi Ngati Ya Mina Ni Hi Swiphemu Swa Yona Leswitsongo?” eka Vutirheli Bya Hina Bya Mfumo bya January 2007. Lava u va hlawuleke leswaku va va vayimeri va wena loko u titivarile swin’we ni swirho swa ndyangu wa ka n’wina leswi nga riki Timbhoni, va fanele va xi tiva kahle xiboho xa wena ni xivangelo xa kona.