Vhidiyo Leyi Kombisaka Laha Vutshunguri Se Byi Voyameleke Kona

Vativi va nawu swin’we ni madokodela se va anakanyisisa swinene hi mavonelo ni timfanelo ta vavabyi. Leswi swi endla leswaku ku va ni tindlela letintshwa to tshungula leti Timbhoni ta Yehovha ti nga vuyeriwaka eka tona. (Mint. 15:28, 29) Leswi hi leswi vhidiyo leyi nge Transfusion-Alternative Health Care—Meeting Patient Needs and Rights yi vulavulaka ha swona. Yi hlalele, kutani u pfuxeta leswi u swi dyondzeke eka yona.—Xiyani: Tanihi leswi vhidiyo leyi yi pfaka yi kombisa ndlela leyi vuhandzuri byi endliwaka ha yona, vatswari va fanele va va ni vuxiyaxiya loko va languta vhidiyo leyi ni vana.

(1) Ha yini madokodela ma tlhela ma kambisisa mhaka ya ku pompela vanhu ngati? (2) Nyika swikombiso swinharhu swa vuhandzuri lebyi rharhanganeke lebyi endliwaka handle ka mpompelo wa ngati. (3) I mangani madokodela emisaveni hinkwayo lama kombiseke leswaku ma tiyimiserile ku tshungula vavabyi handle ko va pompela ngati? Hikwalaho ka yini ma tiyimisela ku endla tano? (4) Xana nkambisiso wa sweswinyana lowu endliweke eswibedlhele wu kombisa yini malunghana ni mhaka ya ku tirhisa ngati? (5) Hi wahi makhombo lama fambisanaka ni ku pomperiwa ngati? (6) Xana vativi vo tala va ri yini malunghana ni vuyelo bya ku tirhisa matshungulelo man’wana handle ka ngati? (7) I yini leswi endlaka munhu a kayivela ngati? Hi wihi mpimo wa ngati lowu vanhu va nga swi kotaka ku hanya ha wona? Xana ku nga endliwa yini leswaku yi engeteleka? (8) Xana tisele to tshwuka ti nga engeteriwa njhani emirini wa muvabyi? (9) Hi tihi tindlela leti tirhisiwaka leswaku ku hungutiwa ku lahlekeriwa hi ngati hi nkarhi wa vuhandzuri? (10) Xana matshungulelo man’wana handle ka ngati ma nga tirhisiwa eka vana ni le ka swiyimo leswi xungetaka vutomi? (11) Hi wihi nchumu wa nkoka lowu nga enawini, lowu faneleke wu tsundzukiwa loko ku tiwa emhakeni yo tshungula muvabyi? (12) Ha yini swi ri swa nkoka eka Vakreste ku hlawula matshungulelo lama nga tirhisiki ngati ka ha ri emahlweni? Xana leswi hi nga swi endla njhani?

Ku amukela byin’wana bya vutshunguri lebyi kombisiweke eka vhidiyo leyi i xiboho lexi endliwaka hi munhu a ri yexe, hi ku yingisa ripfalo rakwe leri leteriweke hi Bibele. Xana se u xi endlile xiboho xa leswaku hi tihi tindlela to tshungula handle ko tirhisa ngati leti wena ni vana va wena mi nga ta ti amukela? Swirho swa ndyangu wa ka n’wina leswi nga riki Timbhoni swi fanele swi xi tiva kahle xiboho xa wena ni xivangelo xa kona.—Vona “Swivutiso Swa Vahlayi” eka minkandziyiso ya Xihondzo xo Rindza ya June 15 na October 15, 2000.