Xana Wa Swi Tiva Leswi U Faneleke U Swi Endla?

Swibedlhele leswi endlaka vuhandzuri handle ko pompela ngati swi karhi swa andza emisaveni hinkwayo. Xana wa ti tiva ni ku ti twisisa tindlela to hambana-hambana ta vutshunguri leti nga tirhisiki ngati leti nga kona sweswi? Swi fanerile leswaku u ti tiva leswaku u ta kota ku endla swiboho leswi faneleke etimhakeni leti khumbaka vutshunguri ni vuhandzuri. Hlalela vhidiyo leyi nge No Blood—Medicine Meets the Challenge. Endzhaku ka sweswo, khongela malunghana ni swilo leswi u swi dyondzeke kutani u swi pfuxeta hi ku tirhisa swivutiso leswi nga laha hansi.—Xiya: Tanihi leswi vhidiyo leyi yi pfaka yi kombisa ndlela leyi vuhandzuri byi endliwaka ha yona, vatswari va fanele va va ni vuxiyaxiya loko va yi hlalela ni vana.

(1) Hi xihi xivangelo-nkulu lexi endlaka Timbhoni ta Yehovha ti ala ku pomperiwa ngati? (2) Loko swi ta emhakeni ya vutshunguri, hi yihi ndlela leyi Timbhoni ta Yehovha ti navelaka ku tshunguriwa ha yona? (3) Hi tihi timfanelo leti vavabyi va nga na tona? (4) Ha yini swi twisiseka naswona ku ri vutlhari ku hlawula tindlela tin’wana ta vutshunguri leti nga tirhisiki ngati? (5) Loko munhu a hume ngati yo tala, hi swihi swilo swimbirhi swa nkoka leswi madokodela ma swi endlaka ku sungula? (6) Hi tihi tindlela ta mune leti tirhisiwaka eka matshungulelo lama nga tirhisiki ngati? (7) Xana madokodela (a) ma nga ha yi sivela njhani ngati leswaku yi nga humi ngopfu, (b) ma nga ti hlayisa njhani tisele to tshwuka ta ngati, (c) ma nga wu pfuna njhani miri leswaku wu aka ngati, (d) ma nga yi vuyisa njhani ngati leyi humeke? (8) Hlamusela endlelo leri vuriwaka (a) hemodilution (ku vevukisa ngati) na (b) ku ponisa tisele. (9) Hi swihi leswi u fanele u swi tiva mayelana ni matshungulelo man’wana lama nga kona lama nga tirhisiki ngati? (10) Xana vuhandzuri lebyikulu ni lebyi rharhanganeke byi nga endliwa handle ko pomperiwa ngati? (11) Hi swihi swilo leswinene leswi lava tivaka swa vutshunguri va nga le ku swi endleni?

Ku amukela byin’wana bya vutshunguri lebyi kombisiweke eka vhidiyo leyi i xiboho lexi endliwaka hi munhu a ri yexe, hi ku yingisa ripfalo rakwe leri leteriweke hi Bibele. Xana se u xi endlile xiboho xa leswaku hi tihi tindlela to tshungula handle ko tirhisa ngati leti wena ni vana va wena mi nga ta ti amukela naswona se mi ri tatile khadi ra DPA? Leswaku u kuma rungula leri heleleke hi timhaka leti, pfuxeta hi vukheta “Swivutiso Swa Vahlayi” eka Xihondzo xo Rindza xa June 15, 2004 ni xa October 15, 2000. Kutani tirhisa maphepha ya mpfampfarhuto lama nga eka xiengetelo lexi nge “Xana Ndzi Fanele Ndzi Tshunguriwa Hi Ngati Ya Mina Ni Hi Swiphemu Swa Yona Leswitsongo?” eka Vutirheli Bya Hina Bya Mfumo bya January 2007, leswaku u tiendlela swiboho malunghana ni tindlela to hambana-hambana ta vutshunguri leti u nga ti amukelaka kumbe leti u nga ti alaka. Xo hetelela, tiyiseka leswaku leswi u swi hlawuleke u swi tsarile ni le ka khadi ra wena ra DPA. Lava u va hlawuleke leswaku va va vayimeri va wena loko u titivarile swin’we ni swirho swa ndyangu wa ka n’wina leswi nga riki Timbhoni, swi fanele swi xi tiva kahle xiboho xa wena ni xivangelo xa kona.

[Bokisi leri nga eka tluka 3]

• Xana se u ti hlawurile tindlela to tshungula handle ko tirhisa ngati leti wena ni vana va wena mi nga ta ti amukela?

• Xana u tshama u ri na rona khadi leri tatiweke ra DPA leswaku ri ku pfuna loko u tshuka u humeleriwe hi xiyimo xa xihatla?