Hi Byihi Vutshunguri Lebyinene Ngopfu?

“Muvabyi un’wana ni un’wana la tshunguriwaka hi mirhi leyi nga riki na ngati, kahle-kahle u fanele a endliwa vuhandzuri bya xiyimo xa le henhla ngopfu.” Marito wolawo ma vuriwe hi Dokodela Michael Rose, la nga mukongomisi wa ta vutshunguri ni mutivi wa ku titivata. Hi tihi tindlela leti nga tirhisiwaka loko muvabyi a fanele a “tshunguriwa handle ko tirhisa ngati”? Swi fanerile leswaku u ti tiva leswaku u ta kota ku endla swiboho leswi faneleke etimhakeni leti khumbaka ku tshunguriwa ni vuhandzuri. Hlalela vhidiyo leyi nge No Blood—Medicine Meets the Challenge. Endzhaku ka sweswo, u tirhisa swivutiso leswi landzelaka ku kambela vutivi bya wena.—Xiya: Tanihi leswi vhidiyo leyi yi pfaka yi kombisa ndlela leyi vuhandzuri byi endliwaka ha yona, vatswari va fanele va va ni vuxiyaxiya loko va yi hlalela ni vana.

(1) Hi xihi xivangelo-nkulu lexi endlaka Timbhoni ta Yehovha ti ala ku pomperiwa ngati? (2) Loko swi ta emhakeni ya vutshunguri, hi yihi ndlela leyi Timbhoni ta Yehovha ti navelaka ku tshunguriwa ha yona? (3) Hi tihi timfanelo leti vavabyi va nga na tona? (4) Ha yini ku ala ku pomperiwa ngati swi twisiseka naswona ku ri vutlhari? (5) Loko ku hume ngati yo tala, hi tihi tindlela timbirhi ta xihatla leti madokodela ma nga ti tirhisaka? (6) Hi yihi misinya ya nawu ya mune ya ndlela leyi matshungulelo lama nga tirhisiki ngati ma tirhaka ha yona? (7) Xana madokodela (a) ma nga yi hungutaka njhani ngati loko yi huma ngopfu, (b) ma nga ti hlayisa njhani tisele to tshwuka ta ngati, (c) ma nga wu pfuna njhani miri leswaku wu aka ngati (d) naswona ma nga yi vuyisa njhani ngati leyi humeke? (8) Hlamusela endlelo leri vuriwaka (a) hemodilution (ku vevukisa ngati) na (b) ku ponisa tisele. (9) Hi swihi leswi u faneleke u swi tiva mayelana ni matshungulelo man’wana ni man’wana lama nga tirhisiwaka ematshan’weni ya ngati? (10) Xana vuhandzuri lebyikulu ni lebyi rharhanganeke byi nga endliwa handle ko pompela ngati? (11) Hi swihi swilo leswinene leswi va ta vutshunguri va nga le ku swi endleni?

Ku pfumela ku tshunguriwa hi ndlela leyi kombisiweke eka vhidiyo leyi i xiboho xa munhu hi yexe lexi a xi endlaka hi ku pfumelelana ni ripfalo ra yena leri leteriweke hi Bibele. Xana se u xi endlile xiboho xa ndlela leyi wena ni vana va wena mi nga ta tsakela ku tshunguriwa ha yona ku nga tirhisiwi ngati? Maxaka ya wena lama nga riki Timbhoni ma fanele ma tivisiwa hi swiboho leswi u swi endleke ni swivangelo swa kona.—Vona “Swivutiso Swa Vahlayi” eka Xihondzo xo Rindza xa June 15, 2004 ni xa October 15, 2000.