Bokisi Ra Swivutiso

◼ Xana i swinene leswaku Timbhoni ta Yehovha ti nyika Timbhoni-kulobye tinkulumo leti rhekhodiweke kumbe leti tsariweke ehansi?

Tinkulumo leti sekeriweke eBibeleni ta hi khutaza ni ku hi tiyisa. (Mint. 15:32) Kutani i swa ntumbuluko ku lava ku byela lava a va nga ri kona hi rungula rero leri khutazaka leri hi ri tweke eminhlanganweni. Leswi ku endliweke michini yo tala yo rhekhoda, swa olova ku rhekhoda nkulumo u tlhela u yi nyika van’wana. Van’wana va hlengelete tinkulumo leti rhekhodiweke, ku katsa ni leti se ku nga hundza malembe ti nyikeriwile naswona va ti lomba vanghana va vona kumbe va va rhekhodela tona leswaku va ti yingisela. Van’wana va tiendlele ti-Web site leti va hoxaka eka tona tinkulumo leti rhekhodiweke leswaku un’wana ni un’wana a ti kopela tona.

A swi bihanga ku va hina vini hi tirhekhodela tinkulumo kumbe hi rhekhodela swirho swa ndyangu. Ku engetela kwalaho, vakulu va nga ha rhekhoda tinkulumo leswaku ti ta yingiseriwa hi swirho swa vandlha leswi tsandzekaka ku ta eminhlanganweni hikwalaho ko vabya. Hambiswiritano, hi ni swivangelo leswi twalaka, leswi nga endlaka leswaku hi nga ti nyiki vanhu van’wana tinkulumo leti rhekhodiweke kumbe leti tsariweke ehansi.

Leswi minkarhi yo tala nkulumo yi nyikeriwaka hi ku ya hi swilaveko swa le vandlheni rolero, swi nga ha endleka leswaku hi nga xi twisisi kahle xikongomelo xa yona tanihi leswi hi nga swi tiviki leswaku hikwalaho ka yini yi nyikeriwile. Ku engetela kwalaho, swi ta hi tikela ku tiva leswaku i mani loyi a yi nyikeleke naswona u yi nyikele rini, ku va hi tiyiseka leswaku rungula ra yona ri le nkarhini naswona ri kongomile. (Luka 1:1-4) Ku hangalasa tinkulumo leti rhekhodiweke kumbe leti tsariweke ehansi swi nga ha endla leswaku vanhu van’wana va sungula ku xixima lava nyikeleke tinkulumo teto kumbe va va dzunisa.—1 Kor. 3:5-7.

Hlonga ro tshembeka ni ro tlhariha ri tirha hi matimba ku hi nyika swakudya swa moya hi “mpimo” lowu ringaneke ni hi “nkarhi lowu faneleke.” (Luka 12:42) Leswi swi katsa lunghiselelo ra tinkulumo leti nyikeriwaka emavandlheni ya Timbhoni ta Yehovha swin’we ni tin’wana leti rhekhodiweke leti nga kopiwaka eka Web site leyi nga enawini ya jw.org. Hi nga tiyiseka leswaku hlonga ro tshembeka ni ro tlhariha swin’we ni Huvo ya rona leyi Fumaka va ta hi nyika leswi hi swi lavaka leswaku hi tiya eripfumelweni.—Mint. 16:4, 5.