Xana Van’wana Va Dyondza Yini Eka Xikombiso Xa Wena?

1. Vadyondzisiwa va Yesu va dyondze yini eka yena hi ku xiyisisa leswi a a swi endla?

¹ Yesu u te: “Tlhandlekani joko ra mina ehenhla ka n’wina mi tlhela mi dyondza eka mina.” (Mat. 11:29) Swi le rivaleni leswaku a a dyondzisa vanhu hi ku va vekela xikombiso lexinene ku nga ri hi marito ntsena. Anakanya hileswi vadyondzisiwa va swi dyondzeke eka leswi Yesu a a swi endla. A a ri ni musa ni rirhandzu. (Mat. 8:1-3; Mar. 6:30-34) A a titsongahata swi suka embilwini. (Yoh. 13:2-5) Loko va ya eku chumayeleni na Yesu, vadyondzisiwa va swi xiyile leswaku a a ri mutirhi la gingiritekaka, la nga ni vutshila eku dyondziseni ka vanhu van’wana ntiyiso. (Luka 8:1; 21:37, 38) Xana van’wana va dyondza yini eka leswi hi swi endlaka loko hi ri ensin’wini?

2. Xana ku languteka ka hina ni ku tikhoma ka hina loko hi ri ensin’wini swi nga va khumba njhani vini va miti?

² Vini Va Miti: Ku ambala hi ndlela leyi xiximekaka, ku tikhoma hi ndlela leyinene ni ku rhandza vanhu swi nga va ni vuyelo lebyinene eka vini va miti. (2 Kor. 6:3; Filp. 1:27) Va swi xiya leswaku nkarhi ni nkarhi hi tirhisa Bibele. Van’wana va tsaka loko hi va yingisela hi xichavo loko va vulavula. U nga yi tekeli ehansi ndlela leyi ku veka xikombiso lexinene eswiyin’weni leswi swi nga va pfunaka ha yona vanhu leswaku va yingisela rungula ra Mfumo.

3. Xana swiendlo swa hina swi nga va khumba njhani vamakwerhu?

³ Vamakwerhu: Anakanya hi ndlela leyi hi nga va khumbaka ha yona vamakwerhu. Ku wu hisekela ka hina ntirho wa nsimu ku nga khutaza van’wana leswaku na vona va wu hisekela. Tanihi leswi nsimbi yi lotaka nsimbi yin’wana, swingheniso swa hina leswi lunghiseleriweke kahle swi nga susumetela van’wana leswaku va antswisa vuswikoti bya vona byo chumayela. (Swiv. 27:17) Loko hi yi hlayisa hi vukheta rhekhodo ya lava kombiseke ku tsakela ni ku tlhelela eka vona hi ku hatlisa, sweswo swi nga khutaza van’wana leswaku na vona va endla tano. Loko hi byi hetisisa hi xitalo vutirheli bya hina, hi ta va xikhutazo lexinene eka vatirhi-kulorhi.—2 Tim. 4:5.

4. Ha yini minkarhi hinkwayo hi fanele hi kambisisa leswi hi swi endlaka ni ku swi vula?

⁴ Minkarhi hinkwayo kambisisa ndlela leyi leswi u swi endlaka ni ku swi vula swi va khumbaka ha yona van’wana. Xikombiso xa hina lexinene xi ta tsakisa Yehovha naswona xi ta hi endla hi titwa ku fana na muapostola Pawulo loko a ku: “Mi va vatekeleri va mina, tanihi leswi mina ndzi nga mutekeleri wa Kreste.”—1 Kor. 11:1.