Landzela Xikombiso Lexi Vekiweke Hi Yesu
1. Hi xihi xikombiso lexi vekiweke hi Yesu?
1 Loko hi ri entirhweni wo endla vadyondzisiwa, hi fanele ku tsundzuka leswaku vanhu va kokiwa rinoko hi swiendlo swa hina ivi va swi tekelela. Yesu u dyondzise hi rito ni hi swiendlo. Lava va n’wi voneke, va xiye ku hiseka ka yena, ku rhandza ka yena vanhu, ku tiyimisela ka yena ku vangamisa vito ra Tata wakwe ni ku endla ku rhandza ka Yena.—1 Pet. 2:21.
2. Xana xikombiso xa hina xi nga va susumeta hi tindlela tihi lava hi chumayelaka na vona?
2 Loko Hi Ri Karhi Hi Chumayela Hi Yindlu Ni Yindlu: Hilaha swi veke hakona eka Yesu, xikombiso xa hina xi susumeta lava hi chumayelaka na vona. Vahuweleri lava ha ku sungulaka ku huma nsimu ni lava nga riki na ntokoto va ta vona swi ri swa nkoka ku hlanganyela entirhweni wo chumayela loko va hi vona hi wu hisekela. Loko va hi vona hi tsakile naswona hi rhandza vanhu hi mbilu hinkwayo, va ta tsundzuka leswaku i swa nkoka ku va ni timfanelo to tano loko va ri karhi va chumayela. Loko va hi vona hi hisekela ku tirhisa Matsalwa, hi endla maendzo yo vuyela naswona hi fambisa tidyondzo ta Bibele, na vona va ta susumeteleka ku endla tano.
3. Xana xikombiso xa hina xi nga swi letela njhani swichudeni swa Bibele naswona i yini leswi swi nga swi dyondzaka?
3 Loko Hi Fambisa Tidyondzo Ta Bibele: Swichudeni swa hina swa Bibele swi ta ma xiya swinene mahanyelo ya hina. Hi xikombiso, hambiloko hi swi khutaza leswaku swi lunghiselela dyondzo, swi kamba matsalwa nileswaku swi khwatihata tinhla-nkulu, swi ta swi xiya loko hi lunghiselerile kumbe hi nga lunghiselelanga. (Rhom. 2:21) Loko hi fika hi nkarhi lowu hi vuleke leswaku hi ta fika ha wona, a swi nge pfumeli leswaku mintirho yin’wana yi yi kavanyeta hi ku olova dyondzo ya swona ya Bibele. Nakambe a swi kanakanisi leswaku swi ta tlhela swi xiya ku tinyiketela ka hina entirhweni wo chumayela ni ripfumelo ra hina leri tiyeke. Hi yona mhaka leyi swichudeni swa lava va xi landzelaka hi ku hiseka xikombiso xa Yesu, hakanyingi swi vaka vachumayeri lava hisekelaka ku vula evhangheli.
4. Loko hi ri eminhlanganweni ya vandlha, van’wana va nga dyondza yini eka xikombiso xa hina?
4 Loko Hi Ri eMinhlanganweni Ya Vandlha: Swirho hinkwaswo swa vandlha ra Vukreste swi hoxa xandla eku dyondziseni hi xikombiso lexinene eminhlanganweni ya vandlha. Vanhu lava tsakelaka, lava sungulaka ku ta eminhlanganweni va vuyeriwa hi xikombiso lexinene lexi va xi dyondzaka evandlheni. Va ta xiya moya lowunene wa ku rhandzana, vun’we bya Vukreste ni maambalelo ni ku tilunghisa lokunene. (Ps. 133:1) Loko va ri eminhlanganweni ya vandlha, va ta tlhela va xiya xikombiso xa hina xa ku nga xwi eminhlanganweni ya vandlha ni ku vula ripfumelo ra hina erivaleni. Un’wana loyi a a endzele minhlangano ya hina u xiye ndlela leyi xinhwanyetana xin’wana a xi kota ku kuma ndzimana ya Bibele hi ku hatlisa loko yi vuriwa ni ndlela leyi a xi rhiya ndleve loko yi hlayiwa. Xikombiso xa xinhwanyetana lexi xi n’wi pfunile leswaku a kombela ku fambiseriwa dyondzo ya Bibele.
5. Ha yini hi nga fanelanga hi xi tekela ehansi xikombiso lexinene lexi hi xi vekelaka van’wana?
5 Matsalwa ma hi khutaza leswaku hi tekelela xikombiso lexinene xa van’wana. (Filp. 3:17; Hev. 13:7) Hikwalaho, hi fanele hi tsundzuka leswaku loko hi landzelerisisa xikombiso lexi Yesu a hi vekeleke xona, van’wana va ta xi tekelela. Leswi se hi tivaka sweswo, onge hi nga anakanyisisa hi marito lama kumekaka eka Timotiya wo Sungula 4, ndzimana ya 16, leyi nge: “Nyikela nyingiso lowu hambetaka eka wena ni le ku dyondziseni ka wena.”