Vatirheli Lava Nga Vakreste Va Fanele Va Khongela

1. I yini leswi hi faneleke hi swi endla leswaku hi hetisisa ntirho wa hina wo chumayela?

¹ Ntirho wo chumayela a hi nge wu endli hi matimba ya hina. Yehovha u hi nyika matimba yo endla ntirho lowu. (Filp. 4:13) U tirhisa tintsumi takwe leswaku ti hi pfuna ku kuma vanhu lava fanaka ni tinyimpfu. (Nhlav. 14:6, 7) Hi yena la endlaka leswaku timbewu ta ntiyiso leti hi ti byalaka ni ku ti cheleta ti kula. (1 Kor. 3:6, 9) Kutani i swa nkoka leswaku vatirheli lava nga Vakreste va ti tshega hi Tata wa hina wa le tilweni hi xikhongelo!

2. Hi swihi swilo swin’wana leswi hi nga khongelaka ha swona?

² Hina Vini: Nkarhi na nkarhi loko hi chumayela hi fanele hi khongela. (Efe. 6:18) Hi swihi swilo swin’wana leswi hi faneleke hi swi khongelela? Hi nga khongelela ku va ni langutelo lerinene hi nsimu ya hina ni ku va ni vurhena. (Mint. 4:29) Hi nga kombela Yehovha leswaku a hi kongomisa eka vanhu va timbilu letinene lava hi nga dyondzaka na vona Bibele. Loko n’wini wa muti a hi vutisa xivutiso, hi nga endla xikhongelo xo koma hi mbilu, hi kombela Yehovha a hi pfuna leswaku hi hlamula hi ndlela leyinene. (Neh. 2:4) Hi nga ha tlhela hi khongelela vutlhari lebyi nga ta hi pfuna leswaku hi rhangisa ntirho wo chumayela. (Yak. 1:5) Ku engetela kwalaho, Yehovha wa tsaka loko hi n’wi nkhensa hikwalaho ka lunghelo leri a nga hi nyika rona ro va vatirheli vakwe.—Kol. 3:15.

3. Xana ku khongelela van’wana swi pfuneta njhani leswaku ntirho wo chumayela wu ya emahlweni?

³ Van’wana: Tanihi Vakreste hi fanele hi “khongelelana,” kumbexana loko swi fanerile hi boxa ni mavito ya lava hi va khongelelaka. (Yak. 5:16; Mint. 12:5) Xana rihanyo ri ku sivela ku endla leswi engetelekeke entirhweni wo chumayela? Kutani khongelela vatirheli-kulobye lava nga ni rihanyo lerinene. U nga yi tekeli ehansi ndlela leyi swikhongelo swa wena swi nga va pfunaka ha yona van’wana! I swa nkoka ku khongelela leswaku vanhu lava nga eswikhundlheni leswi tlakukeke va nga wu siveli ntirho wa hina wo chumayela leswaku vamakwerhu va ‘ya emahlweni va hanya vutomi byo rhula ni byo hola.’—1 Tim. 2:1, 2.

4. Ha yini hi fanele hi phikelela exikhongelweni?

⁴ Ku chumayela mahungu lamanene emisaveni hinkwayo leyi akiweke i ntirho lowukulu. Loko hi “phikelela exikhongelweni,” hi ta swi kota ku hetisisa ntirho wo chumayela hi mpfuno wa Yehovha.—Rhom. 12:12.