Xana Ndza Eneriseka Hi Ntirho Lowu Ndzi Wu Endlaka?

1. I yini leswi Mukreste wo tshembeka a nga ha karhatekaka ha swona?

¹ Xana u tshame u tivutisa xivutiso xexo? Swi nga ha endleka leswaku a wa ha swi koti ku heta nkarhi lowu a wu wu heta u ri ensin’wini hikwalaho ko dyuhala, rihanyo kumbe vutihlamuleri bya ndyangu lebyi engetelekeke. Makwerhu un’wana wa xisati la nga ni vana vanharhu u vula leswaku minkarhi yin’wana u titwa nandzu hikwalaho ka leswi ku khathalela ndyangu wakwe swi n’wi sivelaka ku heta nkarhi wo tala a ri ensin’wini. I yini leswi nga hi pfunaka leswaku hi nga vileli hi nkarhi lowu hi wu hetaka hi ri ensin’wini?

2. I yini leswi Yehovha a swi languteleke eka hina?

² Leswi Yehovha A Swi Languteleke Eka Hina: Swi le rivaleni leswaku hinkwerhu ha swi navela ku heta nkarhi wo tala hi ri ensin’wini. Kambe ku ni ku hambana lokukulu exikarhi ka leswi hi navelaka ku swi endla nileswi hi nga kotaka ku swi endla. Ku va hi navela ku heta nkarhi wo tala hi ri ensin’wini swi kombisa leswaku a hi eneriseki hileswi hi nga eku swi endleni. Hi fanele hi tsundzuka leswaku Yehovha u ku tiva kahle ku tsana ka hina naswona a nga langutelanga swona leswaku hi endla swo tlula leswi nga ematimbeni ya hina. (Ps. 103:13, 14) I yini leswi a swi languteleke eka hina? U lava leswaku hi n’wi tirhela hi mimoya-xiviri ya hina hinkwayo, hi n’wi endlela leswi nga ematimbeni ya hina.—Kol. 3:23.

3. I yini lexi nga hi pfunaka leswaku hi antswisa ntirho wa hina wa nsimu?

³ I yini lexi nga hi pfunaka ku vona leswi hi nga kotaka ku swi endla? Hi nga kombela Yehovha a hi pfuna hi kambisisa xiyimo xa hina. (Ps. 26:2) Hi nga ha tlhela hi pfuniwa hi munghana la nga Mukreste, loyi hi n’wi tshembaka naswona a wupfeke, loyi a hi tivaka kahle naswona a nga chaviki ku hi byela laha hi faneleke hi antswisa kona. (Swiv. 27:9) Nakambe tsundzuka leswaku leswi swiyimo swi cinca-cincaka swi nga va swinene ku kambisisa xiyimo xa hina nkarhi na nkarhi.—Efe. 5:10.

4. Hi fanele hi swi languta njhani switsundzuxo leswi sekeriweke eBibeleni leswi vulavulaka hi ntirho wa nsimu?

⁴ Ndlela Leyi Hi Faneleke Hi Swi Teka Ha Yona Switsundzuxo: Hi nkarhi wa mphikizano wo tsutsuma, vahlaleri va khutaza vanhu lava tsutsumaka. Xikongomelo xa vona i ku va pfuna leswaku va fikelela pakani ya vona, ku nga ri ku va heta matimba. Hilaha ku fanaka, swikhutazo leswi sekeriweke eBibeleni ni switsundzuxo leswi nyikeriwaka eminhlanganweni ni le minkandziyisweni ya hina swo ‘chumayela hi xihatla’ swi vuyerisa hina, ku nga ri ku kombisa leswaku matshalatshala lawa hi ma endlaka a ma ringananga. (2 Tim. 4:2) Hi nga tiyiseka leswaku loko hi hambeta hi endla leswi nga ematimbeni ya hina, Yehovha a nge ri rivali ‘rirhandzu ni mintirho ya hina.’—Hev. 6:10.