The Bible—Its Power in Your Life

Bibele yi pfune vanhu va timiliyoni leswaku va cinca vutomi bya vona. Hi yihi milawu yin’wana ya Bibele leyi nga hi pfunaka leswaku hi hlula swiphiqo leswi hi langutanaka na swona namuntlha? Swi le rivaleni leswaku u ta swi tsakela ku kuma nhlamulo ya xivutiso lexi hi ku hlalela DVD leyi nge The Bible—Its Power in Your Life, leyi ku nga DVD ya vumbirhi eka DVD leyi nge The Bible—A Book of Fact and Prophecy. Endzhaku ko hlalela DVD leyi, xana u nga swi kota ku hlamula swivutiso leswi landzelaka?

(1) Ha yini hi nga vulaka leswaku Bibele a yi fani ni tibuku letin’wana? (Hev. 4:12) (2) Loko ku ri leswaku Bibele ya va pfuna vanhu leswaku va cinca vutomi bya vona, ha yini vanhu va ri ni swiphiqo swo tala swonghasi? (3) Hi yihi nhloko-mhaka ya Bibele? (4) Hi tihi tindzimana ta Bibele leti boxiweke eka DVD leyi, leti nga pfunaka mimpatswa leyi tekaneke leswaku (a) yi antswisa ndlela leyi yi burisanaka ha yona naswona (b) yi lawula ku hlundzuka ka yona? (5) Xana ndlela leyi Vakreste va byi langutaka ha yona vukati byi xi antswisa njhani xiyimo xa ndyangu? (Efe. 5:28, 29) (6) Hi xihi xikombiso lexinene lexi Yehovha a xi vekeleke vatswari? (Mar. 1:9-11) (7) I yini leswi vatswari va nga swi endlaka leswaku dyondzo ya ndyangu yi tsakisa? (8) Handle ka dyondzo ya Bibele, i yini swin’wana leswi Rito ra Xikwembu ri khutazaka vatswari leswaku va swi endlela vana va vona? (9) Xana Bibele yi nga yi pfuna njhani mindyangu leswaku yi langutana ni xiyimo xa ikhonomi? (10) Hi yihi milawu ya Bibele leyi vulavulaka hi ku basa, ku tirhisa swidzidziharisi hi ndlela yo biha, ku nwa byala ku tlula mpimo ni ntshikilelo, leyi nga endlaka leswaku vanhu va va ni rihanyo lerinene loko va yi tirhisa? (11) Hi swihi switshembiso swa Bibele leswi nga hi tiyisaka? (Yobo 33:25; Ps. 145:16) (12) Xana tidyondzo leti nga eRitweni ra Xikwembu ti ku pfune njhani leswaku u cinca vutomi bya wena? (13) Xana u nga yi tirhisa njhani DVD leyi leswaku u pfuna van’wana?