Ntirho Wo Chumayela eXitarateni Lowu Vuyerisaka
1. Hi yihi ndlela yin’wana leyi hi nga n’wi tekelelaka ha yona Yesu?
1 Hi nkarhi wa vutirheli byakwe bya laha misaveni, Yesu a nga kanakani ku vulavula ni vanhu lava a hlangana na vona emagondzweni ni le tindhawini ta mani na mani. (Luka 9:57-61; Yoh. 4:7) A a lava ku avela vanhu vo tala rungula rakwe ra nkoka hilaha a nga kotaka hakona. Namuntlha, ku chumayela exitarateni i ndlela leyinene yo pfuna vanhu leswaku va kuma vutlhari bya Xikwembu. (Swiv. 1:20) Hi ta va lava humelelaka loko hi tshinelela vanhu naswona hi va ni vuxiyaxiya.
2. Loko hi tshinelela vanhu entirhweni wo chumayela exitarateni, i yini leswi katsekaka?
2 Tshinelela Vanhu: I swinene ku tshinelela vanhu ku ri ni ku yima kumbe u tshama endhawini yin’we u rindzela vanhu lava hundzaka leswaku va ta eka wena. N’wayitela, u languta munhu ematihlweni, u va la rhuleke u tlhela u va ni xinghana. Loko u tirha ni vahuweleri van’wana, i swa nkoka leswaku mi nga yi eka vanhu mi tele. Nakambe u fanele u endla matshalatshala yo kuma ndlela yo tlhela u vulavula ni vanhu lava kombiseke ku tsakela. Loko swi koteka, loko mi gimeta bulo, hi musa n’wi vutise leswaku u nga n’wi kumisa ku yini nakambe. Vahuweleri van’wana va endla ntirho wo chumayela exitarateni nkarhi na nkarhi endhawini yin’we, leswi endlaka leswaku va kota ku vulavula ni vanhu lava fanaka hi ku phindha-phindha kutani va hambeta va engetela ku tsakela ka vona.
3. Hi nga va ni vuxiyaxiya hi ndlela yihi loko hi endla ntirho wo chumayela exitarateni?
3 Vana Ni Vuxiyaxiya: Endla xiboho lexinene xa leswaku hi kwihi laha u nga ta yima kona loko u endla ntirho wo chumayela exitarateni ni leswaku hi vahi lava u nga ta va tshinelela. A swi bohi ku chumayela un’wana ni un’wana loyi a hundzaka hi ndlela. Vana ni vuxiyaxiya. Hi xikombiso, loko munhu a jahile swi nga va swinene leswaku u n’wi tshika a hundza. Loko u chumayela emahlweni ka switolo, tirhisa vutlhari ku papalata leswaku mininjhere a karhateka. I swinene ku chumayela vanhu loko va huma eswitolo ku nga ri loko va nghena. Tshinelela vanhu hi ndlela leyi nga ta endla leswaku va nga chavi kumbe u va hlamarisa. Nakambe vana ni vuxiyaxiya loko u fambisa minkandziyiso. Loko vanhu va nga tsakeli, u nga va nyika swiphephana ematshan’weni yo va nyika timagazini.
4. Ha yini ku chumayela exitarateni swi vuyerisa swi tlhela swi tsakisa?
4 Ku chumayela exitarateni swi endla leswaku hi haxa mbewu yo tala ya ntiyiso hi xinkarhana. (Ekl. 11:6) Vanhu van’wana lava hi hlanganaka na vona swi nga ha endleka ku ri lava hi nga va kumiki emakaya loko hi chumayela hi yindlu ni yindlu. Ha yini u nga endli malunghiselelo yo hlanganyela entirhweni wo chumayela wa le xitarateni, lowu tsakisaka wu tlhela wu vuyerisa?