Ku Kuma Lava Tsakelaka Hi Ku Nyikela Vumbhoni Bya Le Xitarateni Lebyi Humelelaka
1 Yesu u lerise vadyondzisiwa vakwe leswaku va lava vanhu lava lavaka ku twa mahungu lamanene ya Mfumo. (Mt. 10:11) Kambe, etindhawini to tala namuntlha, swi ya swi nonon’hwa ngopfu ku vonana ni vanhu emakaya ya vona. Kutani, ku nga endliwa yini leswaku ku fikeleriwa lava fanelekaka lava swi nga endlekaka hi nga va kumi?
2 Ku nyikela vumbhoni exitarateni ku nga ha va ndlela leyi humelelaka yo kuma vanhu lava hi nga va kumiki entirhweni wa yindlu na yindlu. Hi nga nyikela vumbhoni bya le xitarateni eswitichini swa mabazi, etlhelweni ka miako leyi ku nga pfumeleriwiki mani na mani ku nghena eka yona, etipakini ta mani na mani ni le tindhawini tin’wana laha vanhu va tiendlelaka swilo swa vona vini kona.
3 Loko ku boxiwa mhaka yo nyikela vumbhoni exitarateni, van’wana va titwa va chava. Va nga ha kanakana ku hlanganyela entirhweni wolowo hikuva va titwa va chava kumbe va vona onge va ta soriwa hi vanhu lava vengaka rungula ra Mfumo. Hi ntolovelo ku karhateka ka vona a ku na xisekelo. Lava va nga ni ntokoto entirhweni lowu va vula leswaku a wu tiki ku fana ni wa ku nyikela vumbhoni hi yindlu na yindlu. Entiyisweni, va kuma leswaku vanhu va toloverile ku yimisiwa exitarateni hi swivangelo swo hambana-hambana naswona van’wana va nga ha tsakela ku vulavula kumbe ku yingisa ku tlula loko hi va endzela etindlwini ta vona. Xisweswo loko hi ‘tiyisela,’ hi nga ha hlamarisiwa hi mimbuyelo leyi tsakisaka.—1 Tes. 2:2.
4 Xana ntirho wa le xitarateni wu nga endliwa njhani hi ndlela leyi humelelaka swinene? I swa nkoka ku lunghiselela kahle. Hlaya timagazini ka ha ri ni nkarhi ivi u hlawula yinhla yin’we kumbe timbirhi to vulavula ha tona leti u ehleketaka leswaku ti ta tsakisa vanhu lava u hlanganaka na vona. Mhaka ya kwalomu ka 30 wa tisekene yi ta va yi lulamile. Tanihi leswi pakani ya hina ku nga ku tihlanganisa ni vanhu van’wana hi xiviri, hlawula ndhawu leyi hi ntolovelo ku hundzaka vanhu vo tala. Hambi leswi swi nga swinene ku va ni muhuweleri un’wana ekusuhi, hi ntolovelo swa antswa loko mi nga yimi swin’we. Vahuweleri lava yimaka swin’we va nga ha heta nkarhi va dya mabulo swin’we naswona va nga ri na mhaka ni vanhu lava nga ha rhandzaka ku yingisa rungula ra Mfumo.
5 Ku yima endhawini yin’we ivi u kombisa timagazini a swi humeleli ngopfu ku fana ni loko u tshinelela vanhu. Ringeta ku langutana ni munhu ematihlweni. Vana ni rirhandzu ni xinghana, naswona u vulavula hi ku kongoma loko u ri karhi u endla matshalatshala yo sungula bulo. Eka swiyimo swin’wana, u nga ha boheka ku fambanyana na yena, u ri karhi u vulavula. Loko a angula kahle, n’wi fambisele timagazini. Loko a ala timagazini, u nga ha n’wi nyika xiphephana.
6 Hakanyingi i swinene ku lunghiselela marito yo koma lama tlakusaka xivutiso kumbe u vula xiga xo koma lexi nga ta pfuxa ku tsakela. Loko a tsakela, ringeta ku kuma vito rakwe, adirese kumbexana hambi ku ri nomboro yakwe ya riqingho leswaku u ta landzelela ku tsakela. U nga ha ku: “Loko u lava ku dyondza swo tala, ndzi ta tsakela ku ku endzela ekaya ra wena kumbe ndzi hlela leswaku Mbhoni yin’wana yi endla tano.”
7 Nkulu un’wana loyi a a nyikela vumbhoni exitarateni u hlangane ni manana un’wana loyi a nga si tshama a vulavula ni Timbhoni ekaya rakwe. U teke buku naswona a pfumela leswaku makwerhu wa xisati a n’wi endzela ekaya rakwe hi nkarhi lowu faneleke. Vanhu lava engetelekeke lava fanelekaka va nga ha kumiwa ivi va pfuniwa loko hi humelela eku nyikeleni ka vumbhoni bya le xitarateni.—Mint. 17:17.