“Mi Va Ni Ntsetselelo Lowukulu”
1. I vamani vanhu lava lavaka mpfuno namuntlha?
1 Ematin’wini hinkwawo, a ku si tshama ku va ni vanhu vo tarisa xileswi lava lavaka ku kombiwa ntsetselelo. Swiyimo swa misava leyi leswi yaka swi nyanya ku biha swi endla leswaku vanhu va nga tsaki, va tshikileleka naswona va nga vi na ntshembo. Vanhu va timiliyoni va lava mpfuno naswona hina tanihi Vakreste hi le xiyin’weni lexinene xo kombisa vaakelani va hina nkhathalelo wa xiviri. (Mat. 22:39; Gal. 6:10) Xana wu nga kombisiwa njhani nkhathalelo wo tano?
2. Hi yihi ndlela leyinene leyi hi nga kombisaka ntwela-vusiwana ha yona?
2 Ku Kombisa Van’wana Ntwela-vusiwana: Xikwembu hi xona xihlovo xa nchavelelo wa xiviri ni lowu tshamaka hi masiku. (2 Kor. 1:3, 4) Yehovha u hi khutaza leswaku hi n’wi tekelela hi ku va ni “ntsetselelo lowukulu” naswona u hi nyike ntirho wa ku endzela vaakelani va hina leswaku hi ya va byela mahungu lamanene ya Mfumo. (1 Pet. 3:8) Ku chumayela hi ku hiseka i ndlela leyinene yo chavelela “lava vavisekeke mbilu” hikuva Mfumo wa Xikwembu hi wona ntshembo wa xiviri eka lava xanisekaka. (Esa. 61:1) Ku nga ri khale, Yehovha u ta herisa vubihi kutani a simeka misava leyintshwa yo lulama naswona leswi u ta swi endla hi ku susumetiwa hi ntwela-vusiwana lowu a nga na wona eka vanhu vakwe.—2 Pet. 3:13.
3. Xana hi nga va languta njhani vanhu hilaha Yesu a va languta hakona?
3 Languta Vanhu Hi Ndlela Leyi Yesu A Va Languta Ha Yona: Hambiloko a chumayela mintshungu, Yesu a a nga dzikisi mianakanyo yakwe ntsena eka mintshungu yoleyo. A a swi xiya leswaku un’wana ni un’wana wa vona u fanele a enerisa xilaveko xakwe xa moya. A va fana ni tinyimpfu leti nga riki na murisi. Mbilu yakwe yi khumbiwe hileswi a swi voneke naswona sweswo swi endle leswaku a lehisa mbilu loko a va dyondzisa. (Mar. 6:34) Loko hi languta vanhu hi ndlela leyi Yesu a va languta ha yona swi ta hi susumetela ku kombisa un’wana ni un’wana wa vona nkhathalelo wa xiviri. Leswi swi ta vonaka eka ndlela leyi hi vulavulaka ha yona ni le ka ndlela leyi xikandza xa hina xi langutekaka ha yona. Hi ta rhangisa ntirho wo chumayela naswona hi ta cinca-cinca ndlela leyi hi vulavulaka ha yona leswaku hi chavelela un’wana ni un’wana eka leswi n’wi karhataka.—1 Kor. 9:19-23.
4. Ha yini hi fanele hi tikarhatela ku va ni ntwela-vusiwana?
4 Vanhu vo tala ematikweni hinkwawo va angula hi ndlela leyinene eka rungula ra Mfumo naswona ndlela leyi va khomiwaka ha yona ya va phyuphyisa. Loko hi hambeta hi va ni ntwela-vusiwana, hi ta dzunisa Yehovha Xikwembu xa hina lexi nga ni ntwela-vusiwana naswona hi ta xi tsakisa.—Kol. 3:12.