Tlangela Lunghelo Ra Wena Ro Tirhela Xikwembu Hi Ku Chumayela
1. Xana vanhu vo tala emisaveni va wu teka njhani ntirho wa hina wo chumayela?
1 Vanhu vo tala emisaveni leyi ya Sathana va teka ntirho wa hina wo chumayela ku ri “vuphukuphuku.” (1 Kor. 1:18-21) Loko hi nga ri na vuxiyaxiya, vonelo leri, leri soholotiweke ri nga hi heta matimba kutani ri endla leswaku hi nga ha hiseki. (Swiv. 24:10; Esa. 5:20) Hi swihi swivangelo leswi nga kona leswi endlaka leswaku hi tlangela lunghelo ra hina ro va Timbhoni ta Yehovha?—Esa. 43:10.
2. Ha yini vutirheli byi vitaniwa ‘ntirho wo kwetsima’?
2 ‘Ntirho Wo Kwetsima’: Muapostola Pawulo u vulavule hi vutirheli tanihi ‘ntirho wo kwetsima.’ (Rhom. 15:15, 16) Xana vutirheli i ‘ntirho wo kwetsima’ hi ndlela yihi? Ku hlanganyela evutirhelini swi endla leswaku hi va “vatirhi-kulobye” ni “Mukwetsimi,” ku nga Yehovha, kutani swi hoxa xandla eku kwetsimiseni ka vito rakwe. (1 Kor. 3:9; 1 Pet. 1:15) Yehovha u languta ku chumayela ka hina tanihi “xitlhavelo xa ku dzunisa,” kutani vutirheli i mhaka ya nkoka evugandzerini bya hina.—Hev. 13:15.
3. I yini leswi endlaka leswaku ku chumayela mahungu lamanene ku va lunghelo lerikulu?
3 Ku chumayela mahungu lamanene i lunghelo lerikulu leri nyikiweke vanhu vatsongo ntsena. Tintsumi a ti ta endla xiavelo xo tano hi ntsako naswona a swi kanakanisi leswaku a ti ta xi endla ku hiseka swinene. (1 Pet. 1:12) Hambiswiritano, Yehovha u hlawule hina vanhu lava nga hetisekangiki, ku nga ‘swibye swa vumba,’ eka lunghelo leri ro tsakisa!—2 Kor. 4:7.
4. Hi nga swi kombisa njhani leswaku hi tlangela vutirheli bya hina?
4 Ntirho Lowu Hi Faneleke Hi Wu Rhangisa Emahlweni: Leswi hi ri tlangelaka swinene lunghelo ra hina, hi teka vutirheli tanihi “swilo swa nkoka swinene” evuton’wini bya hina. (Filp. 1:10) Hikokwalaho, vhiki ni vhiki hi tivekela nkarhi wo hlanganyela eka byona. Muyimbeleri loyi a tlangelaka lunghelo rakwe ro tlanga vuyimbeleri byakwe etikweni leri dumeke hi okhestra u ta lunghiselela vuyimbeleri byin’wana ni byin’wana lebyi a nga ta byi tlanga naswona a tirhela eku antswiseni ka vuswikoti byakwe. Hilaha ku fanaka, hi ta lunghiselela loko hi nga siya evutirhelini ku endlela leswaku hi ri “tamela khwatsi rito ra ntiyiso” naswona hi ta tirhela eku antswiseni ka “vutshila [bya hina] byo dyondzisa.”—2 Tim. 2:15; 4:2.
5. I mani loyi a tlangelaka vutirheli bya hina?
5 U nga pfumeleli mavulavulelo lama nga riki manene ya vanhu vo tala ma ku heta matimba. Tsundzuka leswaku ka ha ri ni vanhu vo tala ensin’wini ya hina lava swi tlangelaka loko hi va endzela. Hambiswiritano, a hi lavi ku tsakeriwa hi vanhu. Nchumu wa nkoka i ndlela leyi Yehovha a titwaka ha yona naswona wa ma tlangela swinene matshalatshala ya hina.—Esa. 52:7.