Ku Chumayela—Lunghelo Leri Xiximekaka
1 Vutirheli bya mahungu lamanene i lunghelo leri xiximekaka leri Yehovha a hi nyikeke rona. (Rhom. 15:16; 1 Tim. 1:12) Xana u byi languta hi ndlela yoleyo? A hi fanelanga hi pfumelela ku hundza ka nkarhi kumbe ku hlekuriwa hi van’wana swi endla leswaku hi nga ha byi voni byi ri bya nkoka. Ku byarha vito ra Xikwembu i lunghelo leri nyikiweke vanhu va nga ri vangani. Xana hi nga ku kurisisa ku yini ku tlangela ka hina lunghelo leri?
2 Ku chumayela rungula ra Mfumo a swi hi endli leswaku hi tsakeriwa hi misava. Vo tala a va wu tsakeli ntirho wa hina naswona va wu honisa. Van’wana va wu hlekula kumbe ku wu kaneta. Ku kaneta loko tano ku nga huma eka vatirhi-kulorhi, vaakelani hambi ku ri swirho swa ndyangu. Eka vona hi nga ha vonaka hi ri vanhu lava lahlekeke kumbe swiphukuphuku. (Yoh. 15:19; 1 Kor. 1:18, 21; 2 Tim. 3:12) Marito ya vona lama hetaka matimba ma endleriwa ku herisa ku hiseka ka hina ni ku endla leswaku hi tsana kumbe ku tshika lunghelo ra hina leri xiximekaka. Malangutelo yo biha ma kuceteriwa hi Sathana, loyi a ‘pfaleke miehleketo ya lava nga pfumeriki, leswaku va nga voni ku vangama ka mahungu lamanene.’ (2 Kor. 4:4) Xana u endlisa ku yini?
3 I swa nkoka ku tsundzuka leswaku ku chumayela ka hina hi Mfumo i ntirho wa nkoka swinene lowu un’wana ni un’wana wa hina a faneleke ku wu endla namuntlha. Hi ni rungula leri ponisaka vutomi leri nga kumekiki hi tindlela tin’wana. (Rhom. 10:13-15) Ku va lava amukeriwaka hi Xikwembu, ku nga ri hi vanhu, hi yona mhaka leyikulu. Langutelo ra misava leri hoxeke hi ntirho wa hina wo chumayela a ri hi siveli ku twarisa mahungu lamanene hi xivindzi.—Mint. 4:29.
4 Yesu u langute lunghelo rakwe ro endla ku rhandza ka Tata wakwe ri ri ra nkoka swinene. (Yoh. 4:34) U tinyiketele evutirhelini hi laha ku hlawulekeke naswona a nga pfumelelanga swikavanyeto kumbe vakaneti va n’wi heta matimba. Nkarhi hinkwawo a a rhangisa ku chumayela rungula ra Mfumo evuton’wini byakwe. (Lk. 4:43) Hi byeriwa leswaku hi tekelela xikombiso xakwe. (1 Pet. 2:21) Hi ku endla tano, hi tirha tanihi “vatirhi-kuloni eka Xikwembu.” (1 Kor. 3:9) Xana hi tirhisa lunghelo leri hi xitalo? Xana hi lava minkarhi yo avela van’wana mahungu lamanene hi ndlela leyi hleriweke ni ya xitshuketa? Tanihi Timbhoni ta Yehovha, nkarhi na nkarhi hi fanele ku tiyimisela ku ‘twarisa vito ra yena erivaleni.’—Hev. 13:15.
5 Ku hlanganyela ka hina evutirhelini ku titshege swinene hi langutelo ra hina. Xana ha swi tlangela swinene leswi Yehovha a hi endleleke swona? Xana timbilu ta hina ti tele hi rirhandzu ra Yehovha leri hi susumetelaka ku endla hinkwaswo leswi hi nga swi kotaka entirhweni wa yena? Ku anakanyisisa hi mikateko leyi hi yi tsakelaka sweswi ni leyi Yehovha a yi tshembiseke ya nkarhi lowu taka, swi hi pfuna leswaku hi va ni rirhandzu lerikulu eka Muvumbi wa hina. Rirhandzu ro tano ri hi susumetela ku endla swo karhi—hi phikelela ni ku hlanganyela nkarhi na nkarhi entirhweni wa ku chumayela hi Mfumo hi laha swiyimo swa hina swi hi pfumelelaka ha kona. Ku hiseka ka hina ku ta kombisa rirhandzu leri hi nga na rona hi Yehovha ni vaakelani va hina.—Mar. 12:30, 31.
6 Hi kombisa ndlela leyi hi tlangelaka xanchumu ha yona, hi leswi hi swi endlaka ni leswi hi swi vulaka. Xana hi vona lunghelo ra hina ra ku chumayela hi Mfumo ri ri ra nkoka hakunene? Xana ha tinyungubyisa hi vutirheli bya hina? Xana hi tiyimisele ku tiyisela entirhweni lowu wa nkoka ku nga khathariseki nkaneto? Loko hi ri xixima swinene lunghelo leri leri hlamarisaka, hakunene hi ta hiseka ni ku tirha hi mbilu hinkwayo.—2 Kor. 4:1, 7.