Ku Chumayela Hi Mfumo I Lunghelo Ra Risima

¹ Siku ni siku, vanhu va timiliyoni va vuyeriwa eka malunghiselelo ya Yehovha ya musa lama va pfunaka leswaku va hanya. (Mat. 5:45) Hambiswiritano, a va talanga lava kumaka lunghelo lero hlawuleka ro nkhensa Muvumbi wa vona hi ku chumayela mahungu lamanene ya Mfumo wa Xikwembu. (Mat. 24:14) Xana u ri tlangela ku fikela kwihi lunghelo leri ra risima?

² Ku chumayela rungula ra Mfumo swi dzunisa Xikwembu, naswona rungula leri ri nyika ntshembo ni ku rhula eka vanhu lava kayakayisiwaka hi minkarhi leyi ya mangava. (Hev. 13:15) Lava amukelaka rungula leri, va va ni ntshembo wa vutomi lebyi nga heriki. (Yoh. 17:3) Eka mintirho hinkwayo leyi nga kona yo tihanyisa, hi wihi lowu nga pfunaka vanhu hi ndlela yoleyo? Ndlela leyi muapostola Pawulo a a chumayela ha yona yi kombise leswaku wa wu tlangela ntirho wa yena. A a wu teka wu ri ndzalama.—Mint. 20:20, 21, 24; 2 Kor. 4:1, 7.

³ Ku Tlangela Lunghelo Ra Hina Ra Risima: Ndlela yin’wana leyi hi kombisaka ha yona leswaku ha ri tlangela lunghelo leri ro chumayela i ku va hi chumayela hi mbilu hinkwayo. Xana ha tinyika nkarhi wo lunghiselela xingheniso lexi nga ta fikelela timbilu ta lava hi yingisaka? Xana hi nga antswisa ndlela leyi hi ma tirhisaka ha yona Matsalwa ni ndlela leyi hi burisanaka ni vanhu ha yona? Xana nsimu ya hina hi yi tirha swi twala? Xana ha swi kota ku sungula tidyondzo ta Bibele ni ku ti fambisa? Ku fana ni Vakreste vo tshembeka va le nkarhini wa khale ni va sweswi, hi kuma matimba hi ku va ni langutelo lerinene hi ntirho wo chumayela naswona ha ri tlangela lunghelo leri hi nyikiweke rona.—Mat. 25:14-23.

⁴ Loko hi langutane ni mavabyi ni matshimbi ya vudyuhari, kumbe swiyimo swin’wana swo tika, swi tiyisa nhlana ku tiva leswaku matshalatshala ya hina yo hisekela nsimu ma tlangeriwa swinene. Rito ra Xikwembu ra hi tiyisekisa leswaku Yehovha wa ma tlangela matshalatshala wolawo lama endliwaka entirhweni wakwe, hambi ku ri lawa van’wana va ma vonaka ma nga nyawuli.—Luka 21:1-4.

⁵ Ku chumayela hi Mfumo swi hi rhurisa moya. Makwerhu un’wana wa xisati la nga ni malembe ya 92 hi vukhale u te: “Loko ndzi ehleketa hi malembe ya 80 lawa ndzi ma heteke ndzi tirhela Xikwembu, a ndzi tisoli nikatsongo! Loko a ndzo tlhela ndzi vuyela evuntshweni a ndzi ta tlhela ndzi endla wona ntirho lowu, hikuva hakunene, ‘musa wa Xikwembu wa rirhandzu wu antswa ku tlula vutomi hi byoxe.’” (Ps. 63:3) Onge na hina hi nga tlangela lunghelo leri ra risima leri humaka eka Xikwembu—ra ntirho wo chumayela hi Mfumo.