Bokisi Ra Swivutiso

◼ I mani loyi a faneleke a tata xiphemu lexi nga endzhaku ka minkandziyiso ya hina kumbe lexi nga eka Web site ya hina eka Internet?

Hakanyingi minkandziyiso ya hina yi ni swiphemu leswi nga tatiwaka ivi swi rhumeriwa erhavini hi xikongomelo xo kombela minkandziyiso kumbe ku endzeriwa hi Timbhoni ta Yehovha. Ku engetela kwalaho, Web site ya hina ya www.watchtower.org yi nga tirhisiwa ku endla xikombelo xa dyondzo ya Bibele. Malunghiselelo lawa ma pfuna vanhu vo tala ku dyondza ntiyiso. Hambiswiritano, ku va ni swiphiqo loko vahuweleri va tirhisa malunghiselelo lawa leswaku va endla lunghiselelo ra leswaku maxaka ya vona kumbe van’wana va kuma minkandziyiso kumbe va endzeriwa hi munhu wo karhi.

Van’wana lava rhumeriweke minkandziyiso leyi va nga yi laviki ku suka erhavini va gungurile, va vona onge nhlengeletano ya hina ya va karhata naswona yi ni nxaxamelo wa mavito ya vanhu lava nkarhi na nkarhi yi va rhumelaka minkandziyiso. Vahuweleri lava kumeke papila ra leswaku va endzela munhu loyi yena hi yexe a nga kombelangiki ku endzeriwa va tikuma va ri eka xiyimo xo nonon’hwa loko munhu wa kona a kombise leswaku a nga tsakeli. Hikokwalaho, swikombelo leswi endliwaka eka Web site ya hina kumbe hi ku tirhisa swiphephana swi fanele swi huma eka vanhu lava tsakelaka ku nga ri eka vahuweleri lava lavaka leswaku vanghana kumbe maxaka ya vona ma kuma minkandziyiso kumbe ma endzeriwa. Loko rhavi ri xiya leswaku muhuweleri u rhumele xikombelo xo va ri tihlanganisa ni munhu un’wana, ri ta xi honisa xikombelo xexo.

Kutani, xana hi nga ri pfuna njhani xaka kumbe munhu loyi hi n’wi toloveleke hi tlhelo ra moya? Loko u lava leswaku a kuma minkandziyiso, ha yini u nga yi rhumeli eka yena hi ku kongoma tanihi nyiko? Loko a kombise leswaku wa swi tsakela ku endzeriwa hi Timbhoni kambe u nga yi tivi ndlela yo tihlanganisa ni vakulu va le vandlheni ra le ndhawini ya ka vona, u fanele u nyika matsalana wa vandlha ra ka n’wina fomo leyi nge Please Follow Up (S-43), loyi a nga ta yi kambisisa kutani a yi rhumela erhavini. (Vandlha rin’wana ni rin’wana ri fanele ri va ni mphakelo lowu ringaneke wa tifomo leti.) Hambiswiritano, loko munhu loyi a tsakelaka a pfaleriwe ekhotsweni, endhawini leyi pfunaka lava godzomberiweke hi byala ni swidzidziharisi kumbe a ri exibedlhele, a wu fanelanga u tsalela rhavi leswaku ri n’wi rhumela minkandziyiso. Ematshan’weni ya sweswo, u nga n’wi khutaza ku tihlanganisa ni vamakwerhu lava endzelaka ndhawu yoleyo kumbe yena hi yexe a tsalela erhavini.