Hatla U Teka Goza

Ku sukela loko Web site ya hina yi endliwe hi vuntshwa, vanhu lava endlaka swikombelo swo dyondzeriwa Bibele eka Internet va tele ngopfu. Swin’wana swikombelo swi kumiwe loko ku tirhisiwa tindlela letintshwa to chumayela etindhawini ta mani na mani. Rhavi ri hatla ri hundzisa swikombelo leswi. Hi xikombiso, loko xikombelo xa kona xi endliwe eka jw.org, vakulu va le nsin’wini leyi munhu la kombiseke ku tsakela a nga eka yona hakanyingi va ta kuma xikombelo lexi humaka erhavini endzhaku ka masiku mambirhi. Hambiswiritano, swiviko swin’wana swa le nsin’wini swi kombisa leswaku vanhu van’wana lava kombelaka ku dyondzeriwa Bibele va heta mavhiki yo hlayanyana va nga si endzeriwa. Hi nga tiyiseka njhani leswaku ha va pfuna vanhu volavo ku tsakela ka vona ku nga si hela?—Mar. 4:14, 15.

Loko munhu la nga tshamiki ensin’wini ya n’wina a kombisa ku tsakela, namba u tata fomo leyi nge Please Follow Up (S-43) kutani u yi nyika matsalana eka nhlangano wa n’wina lowu landzelaka. Matsalana u fanele a hundzisela rungula rolero evandlheni leri faneleke ku nga si hundza siku rin’we kumbe mambirhi kumbe a ri hundzisela erhavini hi ku ri tsala laha ku tsariweke Congregation eka jw.org. Vakulu va fanele va tshama va ri karhi va kamba Web site leyi. Loko va kuma xikombelo xo endzela munhu wo karhi, va fanele va hatla va n’wi endzela. Muhuweleri la komberiwaka ku endzela munhu wo tano u fanele a hatla a ya. Loko munhu yoloye a nga ri kona ekaya, kumbexana u nga siya xiphephana lexi nga ni tinomboro ta wena ta riqingho kumbe ta laha u tshamaka kona.