Bokisi Ra Swivutiso

◼ Xana vahuweleri va fanele va tirhisa Internet swinene loko va chumayela van’wana kumbe leswaku va dyondza ni vanhu lava va nga va tiviki lava tshamaka etikweni rin’wana?

Vahuweleri van’wana va tirhise Internet leswaku va kuma tidyondzo ta Bibele ematikweni lawa ntirho wa hina wu siveriweke kumbe laha ku nga ni vahuweleri lava nga tatiki ni xandla. Minkarhi yin’wana ku ve ni vuyelo lebyinene. Hambiswiritano, ku nga ha va ni makhombo yo karhi loko vahuweleri va nyikana ti e-mail ni vanhu lava nga va tiviki kumbe va burisana na vona eka Internet. (Vona Vutirheli Bya Hina Bya Mfumo bya July 2007, tl. 3.) Hambileswi xikongomelo xo endla tano ku nga ku fikelela vanhu va timbilu letinene hi rungula ra Mfumo, mabulo yo tano ma nga ha endla leswaku makwerhu wa xinuna kumbe wa xisati a kumana ni vanghana vo biha, ku katsa ni vagwinehi. (1 Kor. 1:19-25; Kol. 2:8) Ku tlula kwalaho, ematikweni lawa ntirho wa Mfumo wu siveriweke kumbe wu yirisiweke, rungula leri rhumeriwaka ri nga ha va ri kambisisiwa hi valawuri. Ku vulavurisana koloko ku nga endla leswaku vamakwerhu va le tikweni rolero va va ekhombyeni. Hikwalaho, vahuweleri a va fanelanga va nghena eka Internet leswaku va lava vanhu va le tikweni rin’wana lava va nga va chumayelaka mahungu lamanene.

Loko hi chumayela hi xitshuketa eka munhu loyi hi nga n’wi tiviki loyi a endzeke a huma etikweni rin’wana, a hi fanelanga hi ringeta ku dyondza na yena loko se a tlhelele eka rikwavo, handle ka loko rhavi ra le tikweni ra rikwerhu ri hi byela ku endla tano. Ku ri na sweswo, hi nga n’wi komba ndlela leyi a nga yi tirhisaka ha yona jw.org leswaku a kuma rungula leri engetelekeke kumbe ndlela leyi a nga tihlanganisaka ha yona ni rhavi ra le tikweni ra rikwavo. Hi nga tlhela hi n’wi khutaza ku endzela Holo ya Mfumo leyi nga ekusuhi ni laha a tshamaka kona. I ntiyiso leswaku ematikweni man’wana a ku na Tiholo ta Mfumo. Loko a tsakela ku endzeriwa hi Timbhoni ta le ndhawini ya ka vona, hi nga n’wi komba ndlela leyi a nga kombelaka ku endzeriwa ha yona hi ku tata fomo leyi nge, Kombela Dyondzo Ya Bibele Ya Mahala eka jw.org hi ririmi ra yena. Rhavi leri langutelaka ntirho wa le tikweni leri munhu la tsakelaka a tshamaka eka rona, ri tolovelane ni swiyimo swo hambanahambana swa kwalaho naswona ri ta swi kota ku n’wi pfuna hi tlhelo ra moya.—Vona Vutirheli Bya Hina Bya Mfumo bya June 2014, tl. 7, ni bya November 2011, tl. 2.

Loko munhu loyi hi n’wi endzelaka sweswi a rhurhela etikweni rin’wana kumbe hi dyondza ni munhu un’wana wa le tikweni rin’wana loyi hi hlanganeke na yena eka Internet, hi fanele hi landzela nkongomiso lowu hlamuseriweke laha henhla. Hambiswiritano, hi nga ha ya emahlweni hi dyondza na yena ku kondza a endzeriwa hi vahuweleri va le ndhawini ya ka vona. Nilokoswiritano, loko munhu a tshama etikweni leri ntirho wa hina wu siveriweke kumbe wu yirisiweke, hi fanele hi va ni vuxiyaxiya swinene loko hi bula hi timhaka leti sekeriweke eBibeleni, loko hi tsalelana mapapila, hi belana riqingho kumbe hi tirhisa switirhisiwa swa elektroniki.—Mat. 10:16.