Minkarhi Hinkwayo Hi Fanele Hi Tshama Hi Lunghekele Ku Chumayela
1. Xana hi swi tivisa ku yini leswaku vavuri va evhangeli va lembe-xidzana ro sungula a va lunghekele ku chumayela minkarhi hinkwayo?
1 Vavuri va evhangeli lava hisekaka va lembe-xidzana ro sungula va vule mahungu lamanene “va nga rhuteli” kun’wana ni kun’wana laha vanhu a va kumeka kona. (Mint. 5:42) Kutani a hi kali hi swi ehleketa leswaku loko va ri karhi va famba hi yindlu ni yindlu a va hundza vanhu egondzweni handle ko va chumayela. Nakambe a va nga wu honisi nkarhi wo chumayela hi xitshuketa loko va ri eku xaveni endhawini ya vuxaviselo endzhaku ka loko va hete vutirheli bya nsimu. Ku fana na Yesu, minkarhi hinkwayo a va tshama va lunghekele ku chumayela.—Mar. 6:31-34.
2. I yini leswi katsekaka eka ku hanya hi ku pfumelelana ni vito ra hina?
2 Minkarhi Hinkwayo Hi Fanele Hi Tshama Hi Lunghekele Ku Chumayela Vanhu: Vito ra hina, leri nge Timbhoni ta Yehovha, a ri hlamuseli ntsena leswi hi swi endlaka; ri hlamusela leswi hi nga swona. (Esa. 43:10-12) Kutani minkarhi hinkwayo hi lunghekele ku lwela ntshembo wa hina, hambiloko hi nga ri eku endleni ka ntirho wa yindlu ni yindlu. (1 Pet. 3:15) Xana u langutela swiyimo leswi nga lavaka leswaku u chumayela hi xitshuketa kutani u ehleketa hileswi u nga swi vulaka? Xana u tshama u ri ni minkandziyiso yo nyika lava kombisaka ku tsakela? (Swiv. 21:5) Xana u chumayela hi yindlu ni yindlu ntsena kumbe u tlhela u chumayela mahungu lamanene eka vanhu lava nga etindhawini tin’wana loko swiyimo swi ku pfumelela?
3. Ha yini xiga lexi nge “tindlela tin’wana” xi nga faneleki hi ku helela ku hlamusela ku chumayela exitarateni ni laha ku pakaka timovha, etiphakeni, etindhawini ta mabindzu ni kun’wana?
3 “Tindlela Tin’wana” To Chumayela: Enkarhini lowu hundzeke, nkarhi wun’wana a hi tirhisa xiga lexi nge “tindlela tin’wana” loko hi vulavula hi ku chumayela exitarateni ni laha ku pakaka timovha, etiphakeni, etindhawini ta mabindzu ni kun’wana. Hambiswiritano, xiga lexi nge “tindlela tin’wana” xi nga ha twala onge matshalatshala wolawo a hi ndlela leyi tolovelekeke yo chumayela naswona munhu a nga swi endla loko a swi lava. Muapostola Pawulo u vule leswaku a chumayela “erivaleni” ni hi yindlu ni yindlu. (Mint. 20:20) Kutani ku chumayela “erivaleni” swa faneleka swinene ku tlula ku chumayela hi “tindlela tin’wana.” I ntiyiso leswaku ku chumayela hi yindlu ni yindlu i ndlela leyi hi yi tirhisaka ngopfu naswona yi pfunaka swinene leswaku hi fikelela vanhu hi rungula ra Mfumo. Hambiswiritano, vachumayeri va lembe-xidzana ro sungula a va chumayela laha vanhu va kumekaka kona. A va tirhisa nkarhi wun’wana ni wun’wana lowu va wu kumaka leswaku va byela vanhu ntiyiso—erivaleni, hi xitshuketa ni hi yindlu ni yindlu. Onge na hina hi nga tirhisa tindlela leti fanaka leswaku hi hetisisa vutirheli bya hina hi xitalo!—2 Tim. 4:5.